„ამ შედეგით ძალიან ვამაყობ“ - სულამანიძე მასტერსის მოგების შემდეგ

იერუსალიმში, ძიუდოისტთა მასტერსზე დღეს საქართველოს სახელით ოქროს მედლის მოპოვება -100 კგ. წონით კატეგორიაში ილია სულამანიძემ შეძლო.

ქართველმა ძიუდოისტმა ფინალში ნიდერლანდელი სიმონ კათარინა დამატებით დროში, შიდოებით დაამარცხა და ტურნირის ჩემპიონობა იზეიმა. საგულისხმოა, რომ სულამანიძემ ¼ ფინალში ამ წონითი კატეგორიის ლიდერი და ტოკიოს ოლიმპიური თამაშების ბრინჯაოს მედლის პრიზიორი, პეტერ პალტჩიკი დაამარცხა.

შეხვედრის დასრულების შემდეგ ილია სულამანიძემ მცირე კომენტარი EJU-ს ჟურნალისტთან გააკეთა.

რა თქვა სულამანიძემ:

სასწაული გრძნობაა, ამ შედეგით ძალიან ვამაყობ. ახლა ძიუდოს მასტერსის გამარჯვებული ვარ და სამომავლოდ ვნახოთ რა იქნება. მადლობა ყველა ძიუდოისტს, ვისთანაც დღეს ბრძოლა მომიწია. პიტერ პალტჩიკი ძალიან ძლიერი ძიუდოისტია. რაც შეეხება ატმოსფეროს, ის წარმოუდგენელი იყო, განსაკუთრებით ასეთი ბრძოლებისთვის.

შეგახსენებთ, რომ ილია სულამანიძის გარდა, იერუსალიმის მასტერსზე ოქროს მედალი -81 კგ. წონით კატეგორიაში ტატო გრიგალაშვილმაც მოიპოვა, -90 კილოგრამში ლუკა მაისურაძე კი ბრინჯაოს მედლის მფლობელი გახდა.