MARCA: რეალს აზარის გაშვება სურს, მაგრამ ბელგიელი არ მიდის

MARCA-ს ცნობით, მადრიდის „რეალს“ ედენ აზართან დამშვიდობება იანვარში სურს, თუმცა ფეხბურთელი გუნდიდან წასვლის წინააღმდეგია. ბელგიელის სურვილია, სეზონი მადრიდის „რეალში“ დაასრულოს.

„სამეფო კლუბში“ იმედოვნებდნენ, რომ ბელგიელი მუნდიალზე თავს კარგად წარმოაჩენდა, თუმცა აზარისთვის მუნდიალი წარუმატებელი გამოვიდა და მისი დამატებით ევროპული კლუბები არ დაინტერესებულან. აზარს კარიერის გაგრძელების შანსი MLS-ში აქვს, თუმცა უცნობია, ფეხბურთელი კლუბიდან წასვლას დათანხმდება თუ არა, რადგან მას და მის ოჯახს მადრიდში ცხოვრება მოსწონთ.

2019 წლის ზაფხულში აზარი ლონდონის „ჩელსიდან“ „რეალში“ გადავიდა. 31 წლის შემტევმა მადრიდულ კლუბში 72 მატჩი ჩაატარა, 7 გოლი შეაგდო და 11 საგოლე პასი შეასრულა. 2019 წელს აზარი ევროპის ერთ-ერთ საუკეთესო ფეხბურთელად ითვლებოდა, თუმცა მისი ესპანური კარიერა ძალიან წარუმატებელი გამოვიდა, რის გამოც მისი სატრანსფერო თანხა მკვეთრად შემცირდა, ამ ეტაპზე Transfermarkt-ის მონაცემებით, აზარი 7,5 მილიონი ევრო ღირს.

ედენ აზარს მადრიდის „რეალთან“ კონტრაქტი 2024 წლამდე აკავშირებს.