ბითაძის 15 წუთი - ინდიანა მინესოტასთან დამარცხდა
ნაციონალურ საკალათბურთო მორიგი მატჩი გამართა „ინდიანა პეისერსმა“. გოგა ბითაძის გუნდი საკუთარ მოედანზე „მინესოტა ტიმბერვულვზს“ დაუპირისპირდა და 14 ქულის სხვაობით, 101:115 დამარცხდა.
ქართველი ცენტრი შეხვედრაში სათადარიგოთა სკამიდან ჩაერთო და მოედანზე 15:27 წუთი გაატარა. ამ დროის განმავლობაში გოგამ 4 ქულა ჩააგდო, სამჯერ მოხსნა ფარიდან ასხლეტილი ბურთი (ერთხელ შეტევაში), 1 შედეგიანი გადაცემა შეასრულა, 2-ჯერ ჩაჭრა მეტოქის შეტევა და 3-ჯერ დაბლოკა ფარისკენ ნასროლი ბურთი. მნიშვნელოვანია, რომ 22 წლის კალათბურთელმა მატჩი დაკარგვის გარეშე დაასრულა და მეტოქის წინააღმდეგ მხოლოდ ერთხელ დაჯარიმდა.
17 ტურის შემდეგ ინდიანა 10 მოგებით და 7 მარცხით აღმოსავლეთ კონფერენციის სატურნირო ცხრილში მე-5 ადგილს იკავებს. ქართველი კალათბურთელის გუნდს მომდევნო მატჩი 25 ნოემბერს, კვლავ საკუთარ მოედანზე „ბრუკლინ ნეთსის“ წინააღმდეგ ელის.
