ევრო 2023: საქართველოს ნაკრების კალენდარი ცნობილია
რუმინეთის დედაქალაქ ბუქარესტში 21-წლამდე ფეხბურთელთა შორის ევროპის 2023 წლის ჩემპიონატის ფინალური ეტაპის წილისყრა გაიმართა. აღნიშნულ ტურნირს რუმინეთი და საქართველო უმასპინძლებენ. რამაზ სვანაძის გუნდის მეტოქეები ბელგია, ნიდერლანდები და პორტუგალია იქნებიან.
A ჯგუფი: საქართველო, ბელგია, ნიდერლანდები, პორტუგალია
B ჯგუფი: რუმინეთი, ესპანეთი, უკრაინა, ხორვატია,
C ჯგუფი: ჩეხეთი, ისრაელი, ინგლისი, გერმანია
D ჯგუფი: ნორვეგია, შვეიცარია, იტალია, საფრანგეთი
ცნობილია A ჯგუფის კალენდარი:
21 ივნისი
საქართველო – პორტუგალია ნიდერლანდები – ბელგია
24 ივნისი
საქართველო – ბელგია ნიდერლანდები – პორტუგალია
27 ივნისი
საქართველო – ნიდერლანდები ბელგია – პორტუგალია
ლევან კობიაშვილი (სფფ-ის პრეზიდენტი): "ჩვენი ქვეყნისთვის მსგავსი მასშტაბის ღონისძიების მასპინძლობა ნამდვილად განსაკუთრებულია. ცხადია, ის, რომ ევროპის ერთ-ერთი პრესტიჟული სანაკრებო ღონისძიება საქართველოში იმართება, უდიდესი ნდობის გამოხატულებაა ჩვენს მიმართ. ჩემპიონატისთვის მზადება აქტიურად მიმდინარეობს, როგორც საორგანიზაციო კუთხით, ისე ინფრასტრუქტურული პროექტების თვალსაზრისით. რაც ყველაზე მთავარია, ჩვენი ახალგაზრდული ნაკრები წარმატებით ემზადება მოახლოებული ჩემპიონატისთვის, გუნდს აქვს სურვილი და ვფიქრობ რესურსიც, რომ წარმატებით ითამაშოს ევროპის ჩემპიონატზე, მითუმეტეს საკუთარ ქვეყანაში. ჩვენი ახალგაზრდები საკმაოდ წარმატებით თამაშობენ სხვადასხვა ევროპულ ლიგაში და ეს, რა თქმა უნდა, კიდევ უფრო ზრდის ინტერესს ფეხბურთისადმი გულშემატკივრებში. ამას გარდა, ამ ევროპის ჩემპიონატის ფარგლებში საქართველოში უამრავ ახალგაზრდა ვარსკვლავს ველოდებით ამჯერად უკვე სხვა ევროპული ნაკებებიდანაც. ასევე, ქვეყნის მასშტაბით იქმნება ახალი ინფრასტრუქტურა და ვფიქრობთ, რომ ეს ხელს შეუწყობს ჩვენს ქვეყანაში ფეხბურთის პოპულარიზაციასა და გოგონათა და ბიჭების ჩართულობას ჩვენთვის ყველასთვის საყვარელ სპორტის სახეობაში".
ალექსანდრე იაშვილი (ტურნირის ელჩი): "ვულოცავ ჩემპიონატის ყველა მონაწილე ნაკრებს ფინალურ ეტაპზე გასვლას. განსაკუთრებით, რა თქმა უნდა, საქართველოს გამოვყოფ, რომელიც დებიუტანტი იქნება ევრო 2023-ზე. ჩვენ ქვეყანაში დიდი მოლოდინია. გულშემატკვირები ელოდებიან ევროპული ფეხბურთის ამჟამინდელ და მომავალ ვარსკვლავებს. მიხარია, რომ ჩვენი ქვეყნის სტადიონებზე ნამდვილი საფეხბურთო გარემო შეიქმნება მომავალი წლის ზაფხულში. ახალგაზრდები უდიდეს გამოცდილებას მიიღებენ, რაც დარწმუნებული ვარ, აუცილებლად დაეხმარებათ წარმატების მიღწევაში. მიხარია, რომ ძლიერი ჯგუფი შეგვხვდა. ბელგია, პორტუგალია და ნიდერლანდები წამყვანი ნაკრებები არიან და ვფიქრობ, რომ ჩვენი მაყურებლისთვის საინტერესო თამაშები იქნება. ჩვენი მიზანია წარმატებას მივაღწიოთ და სიამოვნება და სიხარული მოვუტანოთ ჩვენს გულშემატკივარს".
