ჰალის გამარჯვება - არველაძის გუნდი ჩემპიონშიფში დაუმარცხებელია

ჩემპიონშიფის მესამე ტურში შოთა არველაძის ''ჰალ სიტიმ'' შინ დინ სმიტის გაწვრთნილი ''ნორვიჩი'' 2:1 დაამარცხა.

''ვეფხვების'' რიგებში კოლუმბიელმა ოსკარ ესტუპინიანმა დუბლი შეასრულა, 43-ე წუთზე ანგარიში გახსნა, 62-ე წუთზე ანგარიში ორამდე გაზარდა. ერთადერთი საპასუხო გოლი ჩილელმა მარსელინო ნუნიესმა შეაგდო.

სამი ტურის შემდეგ შოთა არველაძის გუნდი დაუმარცხებელია, საწყის სამ ტურში 7 ქულა მოიპოვა, საკუთარ მოედანზე ''ბრისტოლსა'' და ''ნორვიჩს'' ერთნაირი ანგარიშით სძლია (2:1), ''პრესტონთან'' გასვლით მატჩში ქულა მოიპოვა (0:0).

ამ ეტაპზე ''ჰალი'' და ''უოტფორდი'' ჩემპიონშიფის სატურნირო ცხრილს 7-7 ქულით ლიდერობენ.

მეოთხე ტურში ''ვეფხვები'' ვინსენტ კომპანის გაწვრთნილ ''ბარნლის'' ესტუმრებიან, შოთა არველაძისა და ბელგიელის სამწვრთნელო დაპირისპირება 16 აგვისტოს გაიმართება, რაც ნათლად აჩვენებს, თუ რამდენად გადატვირთული გრაფიკია ინგლისის რანგით მეორე ლიგაში.