გიორგი ანწუხელიძე
Aa
Aa
10 აგვისტო 2022  |  11:47

ანწუხელიძის თასი - საქართველოს გმირის სახელობის ტურნირი კალათბურთში

საქართველოს თავდაცვის ძალებში საქართველოს ეროვნული გმირის, გიორგი ანწუხელიძის სახელობის ჩემპიონატი „3X3“ კალათბურთში დაიწყო. საქართველოს თავდაცვის მინისტრმა ჯუანშერ ბურჭულაძემ ტურნირის მონაწილეებს სპორტულ ასპარეზობაში წარმატება უსურვა და ეროვნული გმირის გიორგი ანწუხელიძის თავგანწირვაზე ისაუბრა. ღონისძიებაზე შეკრებილ საზოგადოებას სიტყვით, ასევე მიმართა საქართველოს კალათბურთის ეროვნული ფედერაციის გამგეობის თავმჯდომარემ. პაატა გურასპაულმა აღნიშნა, რომ კალათბურთის ეროვნული ფედერაცია გამარჯვებულ გუნდს კალათბურთის ევროპის ჩემპიონატზე დასწრების შესაძლებლობას მისცემს.

„3X3“ კალათბურთში ტურნირის ოფიციალურად გახსნის ღონისძიება ნატო-საქართველოს წვრთნებისა და შეფასების ერთობლივი ცენტრის (JTEC) სამწყობრო მოედანზე შედგა, სადაც რამდენიმე გუნდის შეხვედრაც გაიმართა. ტურნირი „3X3“ კალათბურთში ორ ეტაპად ჩატარდება. პირველ შესარჩევ ეტაპზე ერთმანეთს საქართველოს თავდაცვის ძალების ქვედანაყოფების გუნდები შეეჯიბრებიან. გამარჯვებული გუნდები ჩემპიონატის მეორე ეტაპზე გააგრძელებენ ასპარეზობას. ფინალური თამაშები ბათუმის ბულვარში გაიმართება, სადაც ასევე დაგეგმილია დაჭრილ-დაშავებული სამხედრო მოსამსახურეების საჩვენებელი თამაში პარა-კალათბურთში. ტურნირში წელს პირველად მონაწილეობენ ეროვნული გვარდიის რეზერვისტებიც.

19 აგვისტოს გამარჯვებული გუნდი გიორგი ანწუხელიძის სახელობის გარდამავალ თასს მიიღებს, ხოლო საპრიზო ადგილების მფლობელები შესაბამისი მედლებითა და სიგელებით დაჯილდოვდებიან. გიორგი ანწუხელიძის სახელობის 3X3 კალათბურთში ჩემპიონატი საქართველოს თავდაცვის ძალების ორგანიზებითა და კალათბურთის ეროვნული ფედერაციის მხარდაჭერით ტარდება. ჩემპიონატი ტრადიციულ ხასიათს ატარებს და საქართველოს თავდაცვის ძალებში ჯანსაღი ცხოვრების წესისა და სპორტული შემართების ამაღლებას უწყობს ხელს.

საქართველოს ეროვნული გმირი, გიორგი ანწუხელიძე 1984 წლის 18 აგვისტოს, ახმეტის რაიონის სოფელ ქვემო ალვანში დაიბადა. გიორგი ანწუხელიძე 2008 წლის რუსეთ-საქართველოს ომში მონაწილეობდა, 9 აგვისტოს იგი მოწინააღმდეგეს ტყვედ ჩაუვარდა და წამების შემდეგ ცემით მოკლეს. მას 2013 წლის 15 აპრილს, საქართველოს ეროვნული გმირის წოდება მიენიჭა.

მსგავსი სიახლეები

ცხელი ამბები
ასევე დაგაინტერესებთ
„არანორმალური“ კობი ბრაიანტი - კრის ბოშის ისტორია შავ მამბაზე
„არანორმალური“ კობი ბრაიანტი - კრის ბოშის ისტორია შავ მამბაზე