საშინელი შეფასება - IMDB-ზე პოგბას დოკუმენტური ფილმის რეიტინგი 1.0-ია

რამდენიმე დღის წინ, Amazon Prime-ის მიერ გადაღებული დოკუმენტური ფილმი The Pogmentary გავრცელდა, რომელიც პოლ პოგბას ეძღვნება. ფეხბურთელზე გადაღებულ ფილმს საშინელი გამოხმაურება მოჰყვა და ცნობილ ვებგვერდზე, IMDB-ზე მისი შეფასება 1.0-ია.

დღევანდელი მონაცემებით, The Pogmentary IMDB-ის 3242-მა მომხმარებელმა შეაფასა. მათმა აბსოლუტურმა უმრავლესობამ, 3107-მა ადამიანმა, ფილმს 1 ქულა დაუწერა, 5-ზე მაღალი შეფასება კი მხოლოდ 100-მა მომხმარებელმა გაიმეტა.

საინტერესოა, რომ პოგბას დოკუმენტურ ფილმს განხილვებიც დაუწერეს, რომლებშიც მას „ეგოისტს“, „ილუზიებში მყოფ ადამიანსა“ და „ბავშვს“ უწოდებენ. Daily Mail-ის მიხედვით, The Pogmentary სრული ფიასკო გახლდათ და მხოლოდ პოგბას პირად ცხოვრებაზეა ორიენტირებული, „მანჩესტერის“ ხსენება კი მაშინ ხდება, როცა საუბარი კონფლიქტურ სიტუაციებს ეხება.

შეგახსენებთ, რომ პოგბა საფეხბურთო სამყაროს ყურადღების ცენტრში რამდენიმე დღის წინაც მოექცა და ამის მიზეზი მაშინაც მისი დოკუმენტური ფილმი იყო. ერთ-ერთი ეპიზოდში მისი და მისი აგენტის, მინო რაიოლას დიალოგია მოყვანილი და პოგბა „იუნაიტედის“ შეთავაზებას, რომლის მიხედვითაც, მას ყოველკვირეულად, 300 000 გირვანქა სტერლინგი უნდა მიეღო, „არაფერს“ უწოდებს.