განვითარების თასი - საქართველო მოლდოვასთან პენალტებში დამარცხდა

საქართველოს 15-წლამდე ვაჟთა ნაკრებმა, ერევანში მიმდინარე უეფას განვითარების თასზე მეორე შეხვედრა ჩაატარა, სადაც მოლდოვის ნაკრებთან 2:2 ფრედ დასრულებული შეხვედრის შემდეგ, გუნდებმა თერთმეტმეტრიანების სერია შეასრულეს, რომელიც მოლდოველთა გამარჯვებით - 7:6 დასრულდა.

მატჩში ანგარიში მოლდოველებმა გახსნეს. პირველი ტაიმის ბოლოს კი ანგარიში ლუკა წულაიამ გაათანაბრა, რომელმაც ტურნირზე მეორე გოლის გატანა შეძლო. შეხვედრის მე-60 წუთზე, საქართველოს 15-წლამდე ნაკრები გიგი გლუნჩაძემ დააწინაურა, რომელმაც თერთმეტმეტრიანი ზუსტად გამოიყენა.

მოლდოველებმა წონასწორობის აღდგენა მატჩის მიწურულს მოახერხეს - 2:2. ტურნირის რეგულაციების მიხედვით, გუნდებმა შეხვედრის ძირითადი დროის დასრულების შემდეგ, პირდაპირ პენალტების სერია შეასრულეს, სადაც 15-წლამდელები - 7:6 დამარცხდნენ.

შედეგად, ჩვენმა ასაკობრივმა, ძირითად დროში დაფიქსირებული ფრის გამო სტანდარტულად 1 ქულა მოიპოვა, ხოლო მეტოქე გუნდმა პენალტების სერიაში გამარჯვებით დამატებითი 1 ქულა მიიღო და მოლდოველები 2 ქულით, ჯგუფში მესამე ადგილს იკავებენ.

საქართველოს 15-წლამდე ნაკრები, 4 ქულით ჯგუფში მეორე ადგილზეა და პირველობის მოპოვებას, გიორგი ჩიტაურის გუნდი, 12 მაისს, მასპინძელი სომხეთის წინააღმდეგ მატჩში შეეცდება.