„ჩვენი მთავარი მიზანი ჯგუფიდან გასვლაა" - ზუროსმა წილისყრის შედეგები შეაფასა
საქართველოს საკალათბურთო ნაკრების მთავარმა მწვრთნელმა, ილიას ზუროსმა 2023 წლის მსოფლიო ჩემპიონატის საკვალიფიკაციო ეტაპის წილისყრის შედეგები შეაფასა.
„ახლა რთულია ზუსტი შეფასებების გაკეთება, რადგან ნოემბრის ბოლომდე შორია და არ ვიცით როგორი შემადგენლობები ეყოლებათ როგორც ჩვენს მეტოქეებს, ასევე – ჩვენ. თამაშების ნაწილი ევროლიგის კალენდართან კვეთაშია და ზუსტად არ ვიცით, ასეთ პერიოდებში გვეყოლება თუ არა ამ საკლუბო ტურნირში მოასპარეზე მოთამაშეები. ასევე არ ვიცით, როგორი პანდემიური ფონი იქნება ნოემბერში და რომელი ნაკრები რამდენ კალათბურთელს მოისაკლისებს…
სათითაოდ რომ ავიღოთ, ყველა მეტოქე საკმაოდ ძლიერი და ანგარიშგასაწევია. განსაკუთრებით ესპანეთი და უკრაინა. როგორც არ უნდა მივუდგეთ, ესპანეთი მსოფლიოში მოწინავეთა შორისაა და ამას შედეგებით ყოველ უმაღლესი რანგის ტურნირზე ამტკიცებს. უკრაინა ძალიან ძლიერი გუნდია, მით უფრო მაშინ, როცა სრული შემადგენლობითაა. ჩვენ ეს პირადად გვაქვს გამოცდილი, როცა 2017 წლის ევრობასკეტზე უკრაინასთან დავმარცხდით და ჯგუფიდან ამის გამო ვერ გავედით. მაშინ უკრაინას ოპტიმალური შემადგენლობა ჰყავდა და ჩვენც საკმაოდ ძლიერი გუნდით ვიყავით. უკრაინელებს ევროლიგასა და ნბა-ში არ ჰყავთ წამყვანი გამოცდილი მოთამაშეები და სავარაუდოდ, მოახერხებენ კიდეც სრული შემადგენლობის შეკრებას. აი, ასეთი უკრაინა ნამდვილად ძლიერია.
ჩრდილოეთ მაკედონიას კარგად არ ვიცნობთ, მაგრამ რაკი აქამდე მოვიდა, ამ ნაკრებს ნამდვილად შეუძლია სოლიდური წინააღმდეგობის გაწევა – განსაკუთრებით საკუთარ კედლებში. ასე რომ, ყველა მეტოქესთან ბრძოლა გველის და ჩემი შეფასებით, საკმაოდ ძლიერ ჯგუფში მოვხვდით.
ქომაგები ასე არიან: წილისყრის შედეგების შემდეგ იწყებენ ოცნებას და დაგეგმავენ ხოლმე არა მხოლოდ მომავალ, არამედ იმის შემდეგ ეტაპზე რა შეიძლება მოხდეს. მინდა, გითხრათ, რომ ჩვენი მიზანი არის ჯერ ჯგუფიდან გასვლა, ასევე ყველა მატჩში ბოლომდე ბრძოლა. თუკი ჯგუფიდან გასვლას გავინაღდებთ, მხოლოდ მერე შეიძლება იმაზე ფიქრი, რომ მეორე ჯგუფურ ეტაპზე რაც შეიძლება მეტი ქულა გავიყოლოთ. ეს ასეც იქნება, თუკი ჩვენს ერთ-ერთ მთავარ პრინციპს ვუერთგულებთ, რაც ზემოთაც აღვნიშნე და რაც ყოველ მატჩში მაქსიმალურ მობილიზებას და გამარჯვებისთვის ბოლომდე ბრძოლას გულისხმობს. არაპროფესიონალურად მიმაჩნია იმაზე ლაპარაკი, რა იქნება მომავალში, არაა სწორი გათვლების ღიად გაკეთება. ჩვენი ორიენტირი პირველი მატჩია, შემდეგ მეორე და ასე შემდეგ. ნაბიჯ-ნაბიჯ უნდა ვიაროთ და წარმატებასაც მხოლოდ ამ გზით მივაღწევთ“.
შეგახსენებთ, რომ საქართველოს საკალათბურთო ნაკრები G ჯგუფში მოხვდა და მისი მეტოქეები ესპანეთი, ჩრდილოეთ მაკედონია და უკრაინა იქნებიან.
მომზადებულია საქართველოს კალათბურთის ფედერაციის ფეისბუქ გვერდის მიხედვით.
შემოუერთდით ჩვენს Facebook ჯგუფს საგოლე გადაცემა
