''ეს მთავარი სიურპრიზი იყო'' - ფედერაცია ''ლანჩხუთს'' ფინანსურად დაეხმარება
2019 წლის საქართველოს ქალთა საფეხბურთო ჩემპიონატის გამარჯვებული, „ლანჩხუთი“ ჩემპიონთა ლიგის ფინალურ ეტაპზე გავიდა.
მეორე საკვალიფიკაციო ეტაპის შეხვედრაში, გურულებმა რუმინეთში „ოლიპია კლუჟი“ ანგარიშით 1:0 დაამარცხეს. მატჩის ერთადერთ გოლი 68-ე წუთზე „ლანჩხუთის“ ლიდერმა, ხატია ჭყონიამ გაიტანა.
აღნიშნულ მატჩთან დაკავშირებით კლუბმა განცხადება გამოაქვეყნა, სადაც აღნიშნულია, რომ საქართველოს ფეხბურთის ფედერაცია ''ლანჩხუთს'' 45 000 ლარით დაეხმარება.
''უფ, ეს რა იყო!
საფინალო სასტვენი, მასპინძელთა გაოცებული სახეები და ჩვენი გოგონების სიხარულის ცრემლები - ასეთი იყო 2020 წლის 19 ნოემბრის ისტორიული მატჩის ფინალი რუმინეთის ქალაქ კლუჟში, ამ მოვლენის მნიშვნელობა შეიძლება ბოლომდე ვერც კი გავათვითცნობიერეთ, მაგრამ ერთი რამ იყო ძალიან ცხადი - შევძელით გაგვეხარებინა ჩვენი ქვეყანა, რომლისთვისაც ყოველ ასეთ წარმატებას უდიდესი მნიშვნელობა აქვს.
ყველას ძალიან დიდი მადლობა იმ თბილი სიტყვებისთვის, მოლოცვებისთვის, გვერდში დგომისთვის და მხარდაჭერისთვის, დიდი მადლობა მთელ საქართველოს და განსაკუთრებით ჩვენს პატარა ლანჩხუთს, სადაც დიდი და პატარა ამ მატჩის მოლოდინით ცხოვრობდა.
აუცილებლად უნდა აღვნიშნოთ საქართველოს ფეხბურთის ფედერაციის მხარდაჭერა - მათი ხელშეწყობით შესაძლებელი გახდა ეროვნული ნაკრების ტექნიკურ ცენტრში შეკრების გავლა და ასევე მატჩთან დაკავშირებული საორგანიზაციო საკითხების მოგვარება, თუმცა მთავარი სიურპრიზი წინ იყო - მატჩის შემდეგ ფედერაციის გენერალური მდივანი დავით მუჯირი მხოლოდ მოლოცვით არ შემოიფარგლა და გუნდს გააცნო ფედერაციის გადაწყვეტილება ფეხბურთელებისთვის საბონუსე ფონდის 25,000 ლარის ოდენობით, ხოლო კლუბის შემდგომი განვითარებისთვის 20,000 ლარის გამოყოფის შესახებ! დიდი მადლობა ლევან კობიაშვილს და დავით მუჯირს.
ვთვლით, რომ საქართველოს ფეხბურთის ფედერაცია აკეთებს შესაძლებლობის მაქსიმუმს, უფრო მეტ მხარდაჭერას ვისურვებდით ადგილობრივი ხელისუფლებისგან, რომ საერთო ძალისხმევით კლუბს შეექმნას სათანადო ყოფითი და ფინანსური პირობები, ევროპის საუკეთესო 32 გუნდში შესული კლუბი ამას ნამდვილად იმსახურებს.
კიდევ ერთხელ ძალიან დიდი მადლობა ჩვენს ყველა გულშემატკივარს!''
