ალექსის სანჩესი "ინტერს" უახლოვდება

ალექსის სანჩესი მილანის „ინტერის“ რიგებში გადასვლას უახლოვდება. ჩილელი ფეხბურთელი „ნერაძურისთან“ აქტიურ მოლაპარაკებებს მართავს და თუკი Sportitalia-ს დავუჯერებთ, შეთანხმებამდე ფორმალობები რჩება.

გამოცემის გავლენიანი ჟურნალისტის, ალფრედო პედულას, თქმით, მილანელები სანჩესს მშრალი იჯარით აიყვანენ, შემდეგ წელს კი მისი დაახლოებით 15 მილიონ ევროდ გამოსყიდვის საშუალება ექნებათ.

იტალიური პრესა წერს, რომ „შავ-ლურჯები“ ჩილელს პირველ სეზონში ხელფასის სახით 4 მილიონ ევროს გადაუხდიან, დანარჩენ 10 მილიონს კი „მანჩესტერ იუნაიტედი“ დაფარავს. თუმცა, ბრიტანული გამოცემების ცნობით, გუნდები ხელფასის 50-50%-ს გადაიხდიან.

მას შემდეგ, რაც „ინტერი“ სანჩესს გამოისყიდის, მისი წლიური ხელფასი 6.5 მილიონი ევრო გახდება. ფეხბურთელს მილანში ხვალ დილით ელოდებიან, რათა სამედიცინო შემოწმება გაიაროს და „ინტერის“ რიგებს ოფიციალურად შეუერთდეს.