ამორიმის მთავარი დილემა - როგორ გამოიყენოს მოდრიჩი სწორად

41 წლის ფეხბურთელს 100-მეტრიან დისტანციაზე არასდროს გაუმარჯვია. ლუკა მოდრიჩს „ლაციოსთან“ მატჩში გაუჭირდა და ამის მიზეზი აშკარად ტაქტიკური და ფიზიკურია და არა ტექნიკური ხასიათის.

რუბენ ამორიმის „მილანი“ რისკიან, აგრესიულ ფეხბურთს თამაშობს, რომელიც სწრაფ გადასვლებსა და კონტრშეტევებზეა აგებული. პირდაპირ რომ ვთქვათ, ეს ახალგაზრდებისთვის შექმნილი სტილია. საქმე იმაში არ არის, რომ ლუკა ფორმაში აღარ არის — უბრალოდ, მას აღარ შეუძლია 90 წუთის განმავლობაში მოედნის ერთი საჯარიმოდან მეორემდე სირბილი. იქნება ეს სეზონისთვის სერიოზული პრობლემა? ამ საკითხზე იტალიური მედია წერს.

რუბენ ამორიმმა მატჩის შემდეგ ყველაფერი ნათლად ახსნა: „ლუკამ თავი კომფორტულად რომ იგრძნოს, ბურთთან ერთად ძალიან კარგად უნდა ვითამაშოთ. თუ მატჩს მუდმივ დაკარგვად და ქაოსურ სირბილად ვაქცევთ, ეს მისთვის შესაფერისი თამაში არ არის. სწორედ ამიტომ შევცვალეთ მეორე ტაიმში მიდგომა და მოედანზე მუსა შემოვიყვანეთ — მივხვდით, რომ ნახევარდაცვაში ცოტა მეტი სისწრაფე გვჭირდებოდა.

გარდა ამისა, ვფიქრობ, ლუკა ზედმეტად ღრმად, ცენტრალურ მცველებთან ახლოს ჩამოდიოდა, რის გამოც შეტევის დაწყებისას ოთხი ფეხბურთელი გვრჩებოდა, ხოლო ხაზებს შორის მოთამაშეების რაოდენობა გვიმცირდებოდა“.

აქ ორი მნიშვნელოვანი დასკვნის გაკეთება შეიძლება. ამორიმს საკუთარი შეცდომების აღიარების არ ეშინია და არც „ოქროს ბურთის“ მფლობელის გაკრიტიკებას ერიდება — სხვა მწვრთნელები ამას, ალბათ, არ გააკეთებდნენ. შესაბამისად, მისი დასკვნაც ლოგიკურია: „ლუკასთან ერთად შეგვიძლია თამაში, მაგრამ ამისთვის მატჩი ბურთის ფლობასა და კონტროლზე უნდა გადავიყვანოთ. თუ თამაში სირბილის შეჯიბრებად იქცევა, მისთვის ეს შეუძლებელია“.

ეს პრობლემა სრულიად ახალი არ არის. ამორიმმა ამ საკითხზე ჯერ კიდევ პარასკევის პრესკონფერენციაზე ისაუბრა: „ლუკა მუდმივად პრესინგზე ვერ ითამაშებს, მაგრამ ის ყოველთვის კარნახობს თამაშის ტემპს და სხვებზე უკეთ ესმის თამაში. როგორც მწვრთნელმა, არჩევანი უნდა გავაკეთო. მასთან ერთად შეიძლება პრესინგში რაღაც დავკარგოთ, მაგრამ ბურთის ფლობისას მეტი კონტროლი გვაქვს. ლუკას ბურთთან ერთად განსაკუთრებული რაღაც მოაქვს და მინდა, რომ ჩემი გუნდი ბურთს აკონტროლებდეს“.

ზვონიმირ ბობანმა კი დაახლოებით ათი დღის წინ „Gazzetta“-სთან ინტერვიუში ყველაფერი წინასწარ ივარაუდა: „ვფიქრობ, ლუკასთვის ამორიმის სისტემაში თამაში რთული იქნება. ალეგრის დროს მას ორი ცენტრალური ნახევარმცველი აზღვევდა და ღრმად თამაშობდა, ახლა კი სხვა ფეხბურთელთან ერთად 60 მეტრის დაფარვა მოუწევს. რთული იქნება“.

ალეგრისთან წარმატება

ერთი წლის წინ ალეგრიმ მოდრიჩი საკუთარი საფეხბურთო სამყაროს ცენტრში მოაქცია. მან ლუკას ღრმა პლეიმეიქერის როლი მიანიჭა და არა ცენტრალური ნახევარმცველის, როგორც ეს მადრიდის “რეალში“ ჰქონდა. სწორედ ასეთ პოზიციაზე ათამაშებდა ალეგრი თავის გუნდებში მირალემ პიანიჩსა და კლაუდიო მარკიზიოს.

მოდრიჩი რაბიოსა და კიდევ ერთ ცენტრალურ ნახევარმცველთან ერთად თამაშობდა და, რაც ყველაზე მნიშვნელოვანია, მატჩის ტემპს თავად აკონტროლებდა. ბურთის გარეშე, როცა „მილანი“ მაიკ მენიოს წინ ღრმად იკეტებოდა, ლუკა ბუნებრივ ბურთის მომპოვებლად იქცეოდა და გადაცემებს ჭრიდა. ეს ძალიან ღირებული თვისება იყო. ბურთით კი თამაშს მართავდა და სურვილისამებრ აჩქარებდა ან ანელებდა ტემპს.

„მილანი“ მისგან თითქმის არასდროს ითხოვდა ინტენსიურ სირბილს ან მეტოქის ნახევარზე პრესინგის ასაწევად სპრინტებში ჩართვას. ამორიმს საპირისპირო შეხედულებები აქვს და შემთხვევითი არ არის, რომ ის ისეთ ფეხბურთელს ანიჭებს უპირატესობას, როგორიც მუსაა — ფეხბურთელს, რომელსაც მოდრიჩის ტექნიკის მეათედიც კი არ აქვს, თუმცა ენერგია საკმარისად ჰყოფნის ბურთის მოსაპოვებლად და შემდეგ შეტევის ძალისმიერად დასაწყებად. ეს ყველაფერი „ლაციოსთან“ მატჩშიც გამოჩნდა.

მოდრიჩის სტატისტიკა

ციფრები თავისას ამბობს. ჩემპიონატის პირველი ოთხი მატჩის ანგარიშებში მოდრიჩი სირბილის მაჩვენებლებით ლიდერებს შორის ერთხელაც არ ყოფილა. სპრინტი მისი ძლიერი მხარე არ არის.

რომში კი უბრალოდ მისი დღე არ იყო: ლუკამ 43 გადაცემიდან 6 არაზუსტად შეასრულა — მისთვის ეს საკმაოდ ბევრია — და მხოლოდ ერთ ტაიმში ბურთი 13-ჯერ დაკარგა. ასეთი რამ 41 წლის ასაკში შეიძლება მოხდეს, თუმცა იგივე 21 წლის ფეხბურთელსაც შეიძლება დაემართოს.

თუმცა მომავალთან დაკავშირებით კითხვა კვლავ ღია რჩება: როგორ მოახერხებს ამორიმი მოდრიჩის სწორად გამოყენებას? ის ითამაშებს იმ მატჩებში, რომლებშიც „მილანი“ ბურთის ფლობასა და ტემპს აკონტროლებს, სხვა შეხვედრებისთვის კი შესაძლოა მიდგომის გადახედვა გახდეს საჭირო.

ოთხშაბათს, „ბენფიკასთან“ მატჩში, შესაძლოა მოდრიჩი დასვენების მიზნით სათადარიგოთა სკამზე დარჩეს და ამას თავისი ლოგიკა აქვს. თუმცა შემდეგ „ლეჩესთან“ მატჩი და სანაკრებო პაუზა მოდის — პაუზა, რომლის შემდეგაც ხორვატიის ნაკრებსაც მოუწევს დახმარება, რადგან ლუკამ გადაწყვიტა, კვლავ ატაროს ეროვნულ გუნდში ხორვატიული კვადრატებიანი მაისური.

შესვენებები? ცოტა ან საერთოდ არ იქნება.

მოედანზე გატარებული ბოლო წელი სტადიონების ტურნე არ არის — ეს ცხრათვიანი კარუსელია, რომელიც არ ჩერდება და სულ უფრო სწრაფად, უფრო სწრაფად და კიდევ უფრო სწრაფად ტრიალებს. მისგან ჩამოსვლა კი ვარიანტი არ არის.