24-ე თუ მე-2? - უიმბლდონის ქალთა ფინალში უილიამსი და ჰალეპი შეხვდებიან
უიმბლდონის ქალთა თანრიგის პირველი ფინალისტი სიმონა ჰალეპი გახდა. რუმინელმა ჩოგბურთელმა ელინა სვიტოლინას ნახევარფინალური მატჩი იოლად მოუგო.
პირველ სეტში ბრძოლა მხოლოდ საწყის გეიმებში იყო, თუმცა სვიტოლინამ შანსები ვერ გამოიყენა, შემდეგ კი ჰალეპმა მოუმატა და პარტია 6:1-ით დახურა.
სვიტოლინამ, რომელიც დიდი სლემის ტურნირების 1/2 ფინალურ ეტაპზე პირველი უკრაინელი ქალია, მეორე სეტი კარგად დაიწყო და საკუთარ მოწოდებას დამაჯერებლად ინარჩუნებდა. 3:3-მდე ჩოგბურთელები საერთოდ უბრეიკპოინტოდ მივიდნენ, რასაც უკრაინელის ჩავარდნა და ისევ ჰალეპის ბრწყინვალე თამაში მოჰყვა, საბოლოოდ - 6:1; 6:3.
სიმონა ჰალეპი პირველი რუმინელი ქალია, რომელიც უიმბლდონის ფინალში გავიდა.
First Romanian woman to reach the #Wimbledon final…
— Wimbledon (@Wimbledon) July 11, 2019
???????? @Simona_Halep ???????? pic.twitter.com/KTBHms6x8B
დღის მეორე შეხვედრაში ერთმანეთის წინააღმდეგ სერენა უილიამსმა და დიდი სლემის ტურნირების ნახევარფინალის კიდევ ერთმა და ყველაზე ასაკოვანმა დებიუტანტმა, ბარბორა სტრიცოვამ, ითამაშეს.
ამერიკელმა ვარსკვლავმა მატჩი ერთი ამოსუნთქვით ჩაატარა და ჩეხი მეტოქე უბრალოდ კორტიდან გააქრო - 6:1; 6:2.
სერენა უიმბლდონის ფინალში მე-11-ედ გავიდა და ტიტულის მერვედ მოგებას შეეცდება. თუკი ამას შეძლებს, კარიერაში 24-ე დიდი სლემის ტურნირს მოიგებს, რითაც მარგარეტ კორტის მაჩვენებელს გაუთანაბრდება.
An 11th #Wimbledon singles final awaits for @serenawilliams... pic.twitter.com/xLuOIPR7z3
— Wimbledon (@Wimbledon) July 11, 2019
რაც შეეხება ჰალეპს, როლან გაროსის გასული წლის ჩემპიონობის შემდეგ იგი დიდი სლემის მეორე ტიტულს დაუმიზნებს. უილიამსისა და ჰალეპის ფინალური შეხვედრა შაბათს გაიმართება.