“ერთად გავუმკლავდებით“ - გუარდიოლამ მანჩესტერ სიტი დაივა
„მანჩესტერ სიტის“ ყოფილმა მთავარმა მწვრთნელმა პეპ გუარდიოლამ კლუბის მხარდასაჭერად განცხადება გაავრცელა მას შემდეგ, რაც „სიტი“ პრემიერ ლიგის წესების დარღვევაში დამნაშავედ ცნეს. საქმე კლუბის შემოსავლების ხელოვნურად გაზრდასა და ხარჯების 900 მილიონ ფუნტზე მეტით (1.19 მილიარდი დოლარით) შემცირებას ეხება.
გუარდიოლა „მანჩესტერ სიტის“ 10 წლის განმავლობაში ხელმძღვანელობდა და სხვადასხვა კრიზისის დროს კლუბს საჯარო კრიტიკისგან არაერთხელ იცავდა. მათ შორის იყო 2020 წელი, როდესაც უეფამ „სიტის“ თავდაპირველად ჩემპიონთა ლიგაზე მონაწილეობა აუკრძალა, თუმცა კლუბმა გადაწყვეტილება გაასაჩივრა და სანქცია გაუქმდა.
ესპანელი სპეციალისტი ასევე მტკიცედ იცავდა კლუბს 2023 წლის თებერვალში, როდესაც პრემიერ ლიგამ „სიტის“ წინააღმდეგ 100-ზე მეტი ბრალდება წარადგინა. მაშინ გუარდიოლამ განაცხადა, რომ კლუბის ხელმძღვანელობის სრულად სჯეროდა და დარწმუნებული იყო, რომ „სიტის“ დასამალი არაფერი ჰქონდა.
კლუბმა დამოუკიდებელი კომისიის მიერ გამოტანილი გამამტყუნებელი გადაწყვეტილების გასაჩივრების შესახებ მზადყოფნა სამშაბათს საღამოსვე დაადასტურა. გუარდიოლამ კი, რომელიც „მანჩესტერ სიტის“ მფლობელი „სიტი საფეხბურთო ჯგუფის“ გლობალური ელჩის პოზიციას კვლავ იკავებს, კიდევ ერთხელ გამოხატა კლუბის პოზიციის მიმართ ნდობა.
„მსურს, მთელ მსოფლიოში „მანჩესტერ სიტის“ თითოეულმა გულშემატკივარმა იცოდეს, რომ აქ ვარ — როგორც არასდროს“, — დაწერა მან სოციალურ ქსელში.
„ყოველთვის ვიყავი, ახლა ვარ და ყოველთვის ვიქნები ჩემი კლუბის, ჩემი მფლობელის, ჩემი პრეზიდენტის (ხალდუნ ალ მუბარაქის), ფერან სორიანოს („სითი საფეხბურთო ჯგუფის“ აღმასრულებელი დირექტორი), ფეხბურთელების, თანამშრომლების, ენცოს და, რა თქმა უნდა, თქვენ — ჩვენი უნიკალური გულშემატკივრების — გვერდით.
მინდა, ნათლად ვთქვა: ამ ყველაფერს ერთად გავუმკლავდებით. ყველა თქვენგანი მიყვარს“,
View this post on Instagram
ესპანელი სპეციალისტი „მანჩესტერ სიტიში“ 2016 წელს მივიდა და გუნდის მთავარი მწვრთნელის პოსტზე მიმდინარე წლის მაისამდე დარჩა.
პრემიერ ლიგის მიერ კლუბის წინააღმდეგ წარდგენილი ბრალდებები 2009/10-დან 2017/18 წლების პერიოდს მოიცავდა. ამ პერიოდში „სიტიმ“ ინგლისის ჩემპიონატი სამჯერ მოიგო, მათ შორის 2018 წელს, როდესაც პეპის გუნდმა სეზონი რეკორდული 100 ქულით დაასრულა.
