U16 ევროპის ჩემპიონატი - საქართველოს ნაკრების ზედიზედ მე-5 წაგება
საქართველოს 16-წლამდელ კალათბურთელთა ნაკრებმა რუმინეთში მიმდინარე ევროპის ჩემპიონატზე მორიგი მარცხი განიცადა. ქართველმა ახალგაზრდებმა თურქეთთან 71:79 წააგეს და ტურნირზე ზედიზედ მეხუთე შეხვედრა დათმეს.
საქართველოს ნაკრების შემადგენლობაში ყველაზე შედეგიანი ლუკა გაბისონია იყო, რომელმაც 17 ქულა დააგროვა. ტრავმის შემდეგ გუნდს დაბრუნებულმა ცოტნე დგებუაძემ კი 16 ქულა, 8 მოხსნა, 7 შედეგიანი გადაცემა და 4 ჩაჭრა მიითვალა.
მარცხის შემდეგ საქართველოს ნაკრები მეცამეტე-მეთექვსმეტე ადგილებისთვის ბრძოლაში გადაერთო. ქართველ კალათბურთელებს დარჩენილი ორი შეხვედრის მოგება სჭირდებათ, რათა ევროპის ჩემპიონატის B დივიზიონში დაქვეითება თავიდან აიცილონ.
გუნდის მიზანი მინიმუმ მე-13 ადგილის დაკავებაა, რაც საქართველოს ნაკრებს მომავალ წელსაც საუკეთესო გუნდებს შორის დარჩენის საშუალებას მისცემს.
მომდევნო მატჩში ქართველი კალათბურთელები იტალიისა და ისრაელის შეხვედრაში დამარცხებულ გუნდს დაუპირისპირდებიან.
