ბალოგუნის დუბლი და რეინას ლამაზი გოლი | აშშ-ის დამაჯერებელი გამარჯვება პარაგვაისთან

აშშ-ის საფეხბურთო ნაკრებმა მსოფლიო ჩემპიონატი გამარჯვებით დაიწყო. ტურნირის ერთ-ერთმა მასპინძელმა „სოფაი სთედიუმზე“ პარაგვაის ნაკრები მიიღო და მაურისიო პოჩეტინოს გუნდმა მეტოქე 4:1 დაამარცხა.

ამერიკელებმა პირველი ტაიმი ფენომენალურად ჩაატარა და სამი გოლი გაიტანეს. შეხვედრაში ანგარიში მეშვიდე წუთზე გაიხსნა, როდესაც აშშ-ის ნაკრების შეტევის შემდეგ, დამიან ბობადილიამ ბურთი საკუთარ კარში ჩაჭრა. 28-ე წუთზე ფოლარინ ბალოგუნმაც გაიტანა, თუმცა მისი გოლი თამაშგარე მდგომარეობის გამო გაუქმდა.

აშშ სერიოზულ სათამაშო უპირატესობას ფლობდა, პარაგვაელებს კი ბურთი საკუთარი ნახევრიდან ვერ ამოჰქონდათ. 31-ე წუთზე ბალოგუნმა თავისი გოლი მაინც შეაგდო — 24 წლის თავდამსხმელმა კრისტიან პულიშიჩის გადაცემით ისარგებლა — 2:0. პირველი ტაიმის კომპენსირებულ მეხუთე წუთზე ბალოგუნმა დუბლი გაიფორმა.

ამერიკელებს მომენტები მეორე ტაიმშიც ჰქონდათ, თუმცა 73-ე წუთზე გოლი პარაგვაიმ გაიტანა და თავი მაურისიომ გამოიჩინა. შეხვედრაში საბოლოო წერტილი ჯოვანი რეინამ დასვა, რომელმაც მეტოქის კარი ბრწყინვალე სტილში აიღო — 4:1.

ცნობისთვის, აშშ და პარაგვაი ჯგუფში ავსტრალიასა და თურქეთთან ერთად არიან. პოჩეტინოს გუნდი მომდევნო შეხვედრას ავსტრალიასთან გამართავს, ხოლო პარაგვაი თურქეთს დაუპირისპირდება.