16 გოლი, 25 საგოლე მოქმედება და ყველაზე მეტი დრიბლინგი | კვარას სტატისტიკა პსჟ-ში

ხვიჩა კვარაცხელია შესანიშნავ ფორმაში იმყოფება და საფრანგეთის ლიგა 1-ის 26-ე ტურის შეხვედრაში „ნანტის“ წინააღმდეგ დუბლი გაიფორმა. „კვარა“ „პარი სენ-ჟერმენის“ ერთ-ერთი საუკეთესო ფეხბურთელია და ამას სტატისტიკაც ადასტურებს.

მიმდინარე სეზონში ქართველ გარემარბს 16 გოლი აქვს გატანილი, რაც უსმან დემბელესთან ერთად პსჟ-ში საუკეთესო შედეგია. „კვარა“ და დემბელე პირველ ადგილს იყოფენ საგოლე მოქმედებების მხრივაც. ხვიჩასა და უსმანს 25-25 საგოლე მოქმედება აქვთ — 16 გოლი და 9 ასისტი. მათზე მეტი საგოლე გადაცემა მხოლოდ ვიტინიას აქვს — 10.

Sofascore-ის მიხედვით, კვარაცხელია ლიდერობს ზუსტი დარტყმების რაოდენობით. მის ანგარიშზე 44 ზუსტი დარტყმაა, რაც გუნდში საუკეთესო მაჩვენებელია. ასევე, მას ყველაზე მეტი წარმატებული დრიბლინგი აქვს (67) და არის „პარი სენ-ჟერმენის“ ფეხბურთელი, რომლის წინააღმდეგაც მეტოქეებმა წესები ყველაზე მეტჯერ დაარღვიეს — 59.

ცნობისთვის, ლუის ენრიკეს გუნდს მომდევნო შეხვედრა 25 აპრილს ელის და თბილისის დროით 21:00-ზე სტუმრად „ანჟერს“ დაუპირისპირდება. სამი დღის შემდეგ კვარაცხელია და კომპანია ჩემპიონთა ლიგის ნახევარფინალის პირველ შეხვედრაში „ბაიერნს“ უმასპინძლებენ.