მსოფლიო თასი პარაძიუდოში - რევაზ ჩიკოიძე ჩემპიონია

თბილისში მიმდინარე პარაძიუდოს მსოფლიო თასის გათამაშებაზე საქართველოს ნაკრები წარმატებულ ასპარეზობას აგრძელებს. ტურნირის ფინალურ ბლოკში ქართველმა სპორტსმენებმა კიდევ ორი მედალი მოიპოვეს — რევაზ ჩიკოიძე (J1, -95 კგ) ჩემპიონი გახდა, ხოლო ზვიად გოგოჭურმა ვერცხლის მედალი დაისაკუთრა.

ფინალური დაპირისპირება ქართულ დუელად უნდა ქცეულიყო, თუმცა გოგოჭურმა ტრავმის გამო შეხვედრაში მონაწილეობა ვერ შეძლო და შესაბამისად, ოქროს მედალი ჩიკოიძეს ერგო.

ტურნირი მაღალი კონკურენციით გამოირჩევა — მასში მსოფლიოს 27 ქვეყნის 187 პარაათლეტი მონაწილეობს, რაც კიდევ უფრო ზრდის მიღწეული შედეგების მნიშვნელობას.

საქართველოს ნაკრებისთვის ეს წარმატება ძლიერი სტარტის გაგრძელებაა. შეჯიბრის პირველ დღეს ქართველმა პარაძიუდოისტებმა უკვე მოიპოვეს ერთი ოქროსა და სამი ბრინჯაოს მედალი. ჩემპიონი გახდა საბა ბაღდავაძე (J1, -81 კგ), რომელმაც ფინალში დამაჯერებელი გამარჯვება მოიპოვა.

ბრინჯაოს მედლებს დაეუფლნენ ზურაბ ზურაბიანი (J2, -70 კგ), გიორგი გამჯაშვილი (J1, -70 კგ) და ლევან გუგავა (J2, -81 კგ).

ცნობისთვის, პარაძიუდო საქართველოში ერთ-ერთ ყველაზე წარმატებულ პარასპორტად მიიჩნევა. ქართველ სპორტსმენებს არაერთხელ აქვთ მოპოვებული მედლები პარალიმპიურ თამაშებზე, მსოფლიო და ევროპის ჩემპიონატებზე, რაც კიდევ ერთხელ უსვამს ხაზს გუნდის მაღალ დონეს.

თბილისში მიმდინარე მსოფლიო თასიც ამის დასტურია — საქართველოს ნაკრები საკუთარ მოედანზე კიდევ ერთხელ ამტკიცებს, რომ მსოფლიო პარაძიუდოს ერთ-ერთი ლიდერია.