შენგელიას საგოლე პასი - ოფიმ სეზონის მატჩი მოიგო
საბერძნეთის ჩემპიონატის რეგულარული სეზონის ბოლო, 26-ე ტურში, ლევან შენგელიას „ოფი“ სტუმრად „არისს“ დაუპირისპირდა და დამაჯერებლად, 2:0 დაამარცხა.
ქართველი შემტევი სასტარტო შემადგენლობაში იყო და „ოფის“ პირველ გოლში მნიშვნელოვანი როლი ითამაშა. 36-ე წუთზე შენგელიამ საგოლე გადაცემა შეასრულა და თანაგუნდელ ნუსს გაატანინა, რითაც ოფი დაწინაურდა.
58-ე წუთზე კი სტუმრებმა კიდევ ერთი გოლი გაიტანეს და საბოლოდ, 2:0 მოიგეს. ლევან შენგელიამ შეუცვლელად ითამაშა.
საბერძნეთის სუპერლიგის მიმდინარე სეზონში ლევან შენგელიამ „ოფის“ შემადგენლობაში 24 მატჩი ჩაატარა, 1 გოლი გაიტანა და დღეს მეორე საგოლე გადაცემა შეასრულა.
„ოფიმ“ რეგულარული სეზონი 32 ქულით მე-6 პოზიციაზე დაასრულა. ქართველი ფეხბურთელის გუნდი კონფერენს ლიგის საგზურისთვის იბრძოლებს, მეტოქეები კი „ლევადიაკოსი“, „ვოლოსი“ და „არისი“ იქნებიან. კონფერენს ლიგის ჯგუფი სანაკრებო პაუზის შემდეგ დაიწყება.
