მამუკელაშვილი საკუთარ გზაზე – სირთულეებიდან NBA-მდე

სანდრო მამუკელაშვილმა Fullcourt Passport-ის პოდკასტში, საკუთარი კარიერული გზა და სირთულეები გაიხსენა, რომლებმაც წარმატებამდე მიიყვანა.

ქართველმა კალათბურთელმა აღნიშნა, რომ კარიერის დასაწყისი საკმაოდ რთული იყო:

„თავიდან ძალიან რთული იყო, რადგან ბევრს არ სჯეროდა, რომ პროფესიონალად ჩამოვყალიბდებოდი. ოჯახიც უფრო სწავლაზე აკეთებდა აქცენტს, მაგრამ 13 წლის ასაკში უკვე დამინახეს და მეც ვუთხარი — მინდა, რომ ეს სერიოზულად ვცადო.“

ნიუ-იორკში დაბადებული, მაგრამ საქართველოში გაზრდილი მამუკელაშვილი 14 წლის ასაკში იტალიაში გადავიდა, რაც მისთვის მძიმე გამოცდილება აღმოჩნდა:

„ძალიან რთული იყო. ყოველდღე ვიღვიძებდი და საკუთარ თავს ვეკითხებოდი — მინდა თუ არა ამის გაგრძელება. ენის ბარიერი, გარემოს შეცვლა… ყველაფერი რთული იყო.“

მან განსაკუთრებულად გამოყო იტალიელი მწვრთნელი, რომელმაც მის განვითარებაში დიდი როლი ითამაშა:

„ის შესანიშნავი ახალგაზრდული მწვრთნელია. მასწავლიდა სწორ გადაწყვეტილებებს შეტევაში და ძალიან დამეხმარა.“

მამუკელაშვილმა ევროპულ და ამერიკულ კალათბურთს შორის განსხვავებაზეც ისაუბრა:

„ევროპაში ტექნიკურად ვითარდები და კარგი მოთამაშე ხდები, ამერიკაში კი ხდები მებრძოლი — სწავლობ შრომას, აგრესიას და იმას, რამდენად მნიშვნელოვანია მაქსიმალური ძალისხმევა მოედანზე.“

კოლეჯურ პერიოდზე საუბრისას მან აღნიშნა, რომ სწორედ Seton Hall-ში დაიწყო მისი რეალური პროგრესი:

„კოლეჯში დაიწყო ჩემი ნამდვილი განვითარება. მეორე კურსის ბოლოს უკვე იმ დონეზე ვიყავი, რომ მეც ჩემი წილი მინდოდა — მეც მინდოდა წარმატების ნაწილი ვყოფილიყავი.“

NBA-ის კარიერაზე საუბრისას მამუკელაშვილმა სხვადასხვა გუნდში მიღებული გამოცდილება გაიხსენა. განსაკუთრებით აღნიშნა ტორონტოში მუშაობა დარკო რაიაკოვიჩთან:

„ის შესანიშნავი მწვრთნელია. უყვარს სწრაფი თამაში, რაც ჩემს სტილს ძალიან ერგება. შეცდომებს აუცილებლად გაჩვენებს ვიდეოანალიზზე და მუდმივად გამოწვევებს გთავაზობს. მისი მიდგომა ასეთია — თუ არ გაჯობეს, ესე იგი საკმარისად აგრესიული არ ხარ. მე ასეთი სტილი ძალიან მომწონს.“

პირად პროგრესზეც გაამახვილა ყურადღება:

„კევინ უილარდმა ისევ დამაბრუნა იმ თავდაჯერებაში, რაც მჭირდებოდა. მან მომცა შესაძლებლობა, ვიყო ის, ვინც ვარ.“

მამუკელაშვილმა საკუთარი გზის მიმართ მადლიერებაც გამოხატა:

„ყოველ დილას მადლიერი ვიღვიძებ. პატარა ქვეყნიდან — საქართველოდან მოვდივარ და ხშირად ვფიქრობ, როგორ მოვაღწიე აქამდე.“

მომავლის გეგმებზე საუბრისას მან აღნიშნა, რომ კარიერის დასრულების შემდეგ სურს საქართველოსა და ევროპაში კალათბურთის განვითარებაში ჩაერთოს:

„მინდა კარიერა იქ დავასრულო და დავეხმარო ახალგაზრდებს. მაგალითად, საზაფხულო ბანაკების ორგანიზებით, მწვრთნელების ჩამოყვანით და იმ ტალანტის უკეთ წარმოჩენით, რაც საქართველოში ნამდვილად არსებობს. იმედი მაქვს, ეს ჩვენს განვითარებას დაეხმარება.“