წიტაიშვილი თავისუფალი აგენტი ხდება - დინამო სარგებელს ვერ მიიღებს
კიევის „დინამო“ შესაძლოა გიორგი წიტაიშვილის ტრანსფერისგან ფინანსური სარგებლის გარეშე დარჩეს. საქართველოს ნაკრების ფეხბურთელს უკრაინულ კლუბთან მოქმედი კონტრაქტი უახლოეს პერიოდში ეწურება და არსებობს რეალური ალბათობა, რომ ის გუნდს თავისუფალი აგენტის სტატუსით დატოვებს.
უკრაინული მედიის ინფორმაციით, 23 წლის გარემარბის მომავალი კვლავ გაურკვეველია, თუმცა მის მიმართ ევროპული კლუბების ინტერესი იზრდება.
უკრაინული Sport-ის ინფორმაციით, წიტაიშვილს ფრანგული „ლიონი“ და „ლილი“, იტალიური „ლაციო“ და ასევე ესპანური „ვილიარეალი“ აკვირდება. აღნიშნული კლუბები ფეხბურთელის შესაძლო უფასო ტრანსფერს განსაკუთრებით მიმზიდველ ვარიანტად განიხილავენ.
იურისტ ილია სკოროპაშკინის შეფასებით, „დინამოს“ შანსი, მოთამაშის სანაცვლოდ კომპენსაცია მიიღოს, მინიმალურია. მთავარი მიზეზი კონტრაქტის ვადაა — თუ მხარეები ახალ შეთანხმებას ვერ მიაღწევენ, ფეხბურთელი თავისუფალი აგენტი გახდება და ნებისმიერ კლუბში შეძლებს გადასვლას, რაც კიევურ გუნდს ტრანსფერიდან შემოსავალს დაუკარგავს.
თუმცა, „დინამოს“ გარკვეული სარგებლის მიღების შესაძლებლობა მაინც რჩება. უეფა-ს მოქმედი სოლიდარობის მექანიზმის მიხედვით, კლუბი, რომელმაც ფეხბურთელი აღზარდა, მისი მომავალი ფასიანი ტრანსფერების გარკვეულ პროცენტს იღებს. ამ შემთხვევაში, კიეველებმა შესაძლოა დაახლოებით 5%-ის მიღება შეძლონ, რადგან წიტაიშვილი სწორედ მათი აკადემიის აღზრდილია.
გიორგი წიტაიშვილი მიმდინარე სეზონში ფრანგულ „მეცში“ იჯარის წესით თამაშობს, სადაც სტაბილური სათამაშო დრო აქვს და გუნდის ერთ-ერთი აქტიური შემტევია. მისი კარგი ფორმა და პროგრესი სწორედ ის ფაქტორია, რაც ევროპული კლუბების ინტერესს ზრდის.
ცნობილია, რომ ფეხბურთელი უკრაინაში დაბრუნებას არ განიხილავს, რაც არსებული გეოპოლიტიკური ვითარებითაც არის განპირობებული. შესაბამისად, დიდი ალბათობით, ქართველი ფეხბურთელი კარიერას დასავლეთ ევროპაში გააგრძელებს.
აღსანიშნავია, რომ ბოლო წლებში ქართველ ფეხბურთელებზე მოთხოვნა ევროპაში მნიშვნელოვნად გაიზარდა, განსაკუთრებით კი შემტევი სტილის მოთამაშეებზე. წიტაიშვილიც იმ კატეგორიას მიეკუთვნება, რომელიც სწრაფი თამაშითა და ტექნიკით გამოირჩევა, რაც მას სატრანსფერო ბაზარზე მოთხოვნად ფიგურად აქცევს.
