ქართული მენტალიტეტი და პროგრესი | Le Parisien-ის სტატია კვარაზე და ინტერვიუ უებთან

ავტორიტეტულმა ფრანგულმა გამოცემამ, Le Parisien-მა, ხვიჩა კვარაცხელიას სტატია მიუძღვნა. გამოცემა საქართველოს ეროვნული ნაკრების მთავარი მწვრთნელის, ვილი სანიოლის ასისტენტს, დევიდ უებსაც დაუკავშირდა და მასთან ინტერვიუ ჩაწერა.

„ხვიჩა კვარაცხელია ლუის ენრიკეს სისტემის ერთ-ერთი მნიშვნელოვანი რგოლი და პარიზელი ქომაგების საყვარელი ფიგურაა. კვარაცხელია ვიდეოანალიზის საშუალებით საკუთარ თამაშს ხვეწს; მას აქვს სპეციალური ვარჯიშები, რომელთა დახმარებითაც ფეთქებადობასა და მიმართულების სწრაფად შეცვლის უნარს იუმჯობესებს.

მისი დარტყმა უზუსტესი მოქმედებაა. ძალისა და სიზუსტის ასეთი კომბინაცია აიხსნება არა მხოლოდ მოქმედების მრავალჯერადი გამეორებით, არამედ თეძოს მომხრელი და მუხლის გამშლელი კუნთების გაძლიერებაზე აქტიური მუშაობითაც.

არასდროს გაჩერდე, არასდროს დაიმალო — ეს კვარაცხელიას მენტალიტეტია. ამ მენტალიტეტს თავად ხვიჩა „ქართულს“ უწოდებს. პატივისცემისა და პირობის შესრულების კულტურაზე დაფუძნებული აღზრდა მას, როგორც საკუთარი ქვეყნის ელჩს, ავალდებულებს, ყოველთვის მაქსიმუმი გააკეთოს. კვარაცხელიამ ფიზიკური კონდიციები და მოძრაობები მნიშვნელოვნად გააუმჯობესა — ახლა ისინი სიმკვირცხლესა და მოქნილობაზეცაა დამოკიდებული და არა მხოლოდ ფეთქებადობაზე," - წერს Le Parisien-ი

დევიდ უების კომენტარი:

„სავარჯიშო სესიების შემდეგ ხვიჩას ყოველთვის დამატებითი ვარჯიშების გაკეთება სურს. საქმე იქამდე მიდის, რომ ხანდახან ვეუბნებით, დამშვიდდეს და დაისვენოს. კვარაცხელია ძალისა და სიზუსტის კომბინაციას შესანიშნავად ახდენს; ის მცველებისთვის ნამდვილი ღამის კოშმარია.

პარი სენ-ჟერმენთან კონტრაქტის გაფორმების შემდეგ მან დაცვაში თამაში გააუმჯობესა და გუნდურობის მხრივაც მოუმატა. ლუის ენრიკემ მის პროგრესში დიდი როლი ითამაშა, რადგან ვხედავთ, რომ პსჟ-ში კვარა დაცვაში აქტიურად ჩადის.

ქართველი ფეხბურთელი ახლა ჭკვიანურ გადაწყვეტილებებს იღებს და დრიბლინგს საჭირო დროს იწყებს. მან იცის, როგორ შეარჩიოს მომენტი. ეს განსაკუთრებით ჩემპიონთა ლიგის მატჩებისას ჩანს, რომლებშიც მაღალი ტემპია.

ყველა დიდ მოთამაშეს არ აქვს სურვილი, გუნდისთვის იშრომოს და დაცვაში ითამაშოს. ის საკუთარ კარს შეუპოვრად იცავს და მაშინაც მაქსიმუმს აკეთებს, როდესაც შეხვედრის დასრულებამდე 10 წუთია დარჩენილი“.

ხვიჩა კვარაცხელია ლუის ენრიკემაც შეაქო. მატჩისწინა პრესკონფერენციაზე ესპანელმა სპეციალისტმა განაცხადა, რომ „კვარა“ განსაკუთრებული მოთამაშეა, რადგან დრიბლინგის, გოლების გატანისა და დაცვაში ეფექტური თამაშის უნარებს აერთიანებს.