The Guardian-ის ტოპ 100 ფეხბურთელი | რომელ ადგილზეა ხვიჩა კვარაცხელია

ავტორიტეტული ბრიტანული გამოცემა, The Guardian, საკუთარ ვებგვერდზე ყოველწლიურ რეიტინგს აქვეყნებს და მსოფლიოს საუკეთესო 100 ფეხბურთელს ასახელებს. წლევანდელ ტოპ 100-ში ხვიჩა კვარაცხელია მოხვდა და The Guardian-მა „პარი სენ-ჟერმენის“ გარემარბს მე-14 პოზიცია მიაკუთვნა.

„ბევრი მიზეზის გამო, ხვიჩა კვარაცხელია საერთოდ არ ჰგავს ფეხბურთელებს, რომლებსაც პარი სენ-ჟერმენი „ბლინგ-ბლინგ“-ის (პერიოდი, როდესაც კლუბი სუპერვარსკვლავებს იფორმებდა, რათა საფეხბურთო პროექტთან ერთად ბრენდის ცნობადობა გაეზარდა — მესი, მბაპე, ნეიმარი) ეპოქაში იფორმებდა. ქართველი ფეხბურთელი გუნდს იანვარში, დიდი თანხის სანაცვლოდ შეუერთდა, მაგრამ გამოირჩევა თავდაუზოგავობით, რაც მის წინამორბედებს ნამდვილად აკლდათ.

ბურთის გარეშე ყოფნისას ის თავდაუზოგავად შრომობს, რაც ჩემპიონთა ლიგის გასული სეზონის პლეი-ოფში ძალიან კარგად გამოჩნდა. ქართველი ფეხბურთელი დაცვაში ხშირად ჩადიოდა და „პარი სენ-ჟერმენს“ ბურთს უბრუნებდა. გარდა ამისა, მესის, ნეიმარისა და მბაპეს მსგავსად, მას აქვს უნარი, ერთი მოქმედებით მატჩის ბედი შეცვალოს. მაშინ, როდესაც MNM-ს (მესი, ნეიმარი, მბაპე) დიდ სცენაზე ხშირად არაფერი გამოსდიოდა, კვარაცხელია საუკეთესო თამაშს ჩემპიონთა ლიგის შეხვედრებისას აჩვენებდა“, — წერს The Guardian-ი.

ცნობისთვის, კვარაცხელია დეკლან რაისს, დეზირე დუეს, ჟოაუ ნევეშს, ჯუდ ბელინგემს, სკოტ მაკტომინეის, ლაუტარო მარტინესს, მაიკლ ოლისეს, ვინისიუს ჟუნიორს, ვირჯილ ვან დეიკს და სხვა სუპერვარსკვლავებს უსწრებს.