„მძულს ეს ნაძირალა პიმბლეტი“ - ცარუკიანი გეიჯის დახმარებას სთავაზობს

დენა უაითის გადაწყვეტილების შემდეგ, რომელმაც 24 იანვარს, დროებითი ჩემპიონის ტიტულისთვის ჯასტინ გეიჯისა და პედი პიმბლეტის ჩხუბი დააანონსა, UFC-ის მსუბუქ წონით დივიზიონში არსებული ისედაც დაძაბული ვითარება, კიდევ უფრო დაიძაბა. აღნიშნული მოცემულობით ყველაზე მეტად იმედგაცრუებული არმან ცარუკიანი დარჩა, რომელსაც ეგონა რომ რამდენიმე კვირის წინ დენ ჰუკერის დამარცხების შემდეგ სატიტულო ჩხუბს მიიღებდა, თუმცა კოვზი ნაცარში ჩაუვარდა და ახლა სიბრაზეს ვერ მალავს.

არმან ცარუკიანი

დიდი იმედი მაქვს, რომ ჯასტინ გეიჯი პედი პიმბლეტს მიწასთან გაასწორებს. როგორი გეგმა მექნებოდა პიმბლეტისთან დაპირისპირების შემთხვევაში? მას პარტერში გადავიყვანდი და იდაყვების ჩარტყმით სახეს დავუმახინჯებდი. საბმიშენზე ერთი წამითაც არ ვიფიქრებდი, რადგან მენდომებოდა, რომ მისი წამება რაც შეიძლება დიდხანს გაგრძელებულიყო.

ჯასტინ გეიჯის მივმართავ, თუ ამ ბრძოლისთვის მზადებაში დახმარება დაგჭირდება, უბრალოდ მითხარი და გვერდში დაგიდგები. საშინლად მძულს ეს ლივერპულელი ნაძირალა და სადმე შემთხვევით თუ შემხვდა, მისი ამბავი კარგად არ დასრულდება.

შეგახსენებთ, რომ გეიჯი-პიმბლეტის სატიტულო ჩხუბის ჩანიშვნის წინაპირობა ილია თოფურიას გადაწყვეტილება გახდა, რომელმაც პირადი პრობლემების გამო სპორტში პაუზა აიღო და აღნიშნა, რომ 2026 წლის პირველ კვარტალში ოქტაგონზე არ გავა.