გოლს პლუს საგოლე გადაცემა - ტრავმით მოთამაშე ნეიმარმა სანტოსს მოაგებინა

ბრაზილიის სერია A-ს 336-ე ტურში „სანტოსმა“ „რესიფეს“ უმასპინძლა და 3:0 დაამარცხა. მატჩის მთავარი გმირი ნეიმარი გახდა, რომელმაც გოლს + საგოლე გადაცემა გაიფორმა.

როგორც მოგეხსენებათ, რამდენიმე დღის წინ, ნეიმარმა ტრავმა მიიღო და ოპერაციას საჭიროებდა, თუმცა გუნდის დახმარების მიზნით მან ოპერაციაზე უარი თქვა და რეაბილიტაციას გამაყუჩებლების გაკეთების ფონზე გადის, რაც რა თქმა უნდა დიდი რისკის შემცველია, მაგრამ მისთვის „სანტოსის“ უმაღლესში დარჩენა ნომერ პირველი მიზანია, რასაც ჯერჯერობით თავს ართმევს კიდეც.

რაც შეეხება უშუალოდ მატჩს, 25-ე წუთზე ანგარიში ნეიმარმა გახსნა, რომელმაც ჩვეულ სტილში ტექნიკურად დაფარული დარტყმით გაიტანა. შემდეგ იყო სტუმრების ავტოგოლი და ბოლოს 67-ე წუთზე ნეიმარის კუთხური, რომელსაც ჟოაოა შმიდტის გოლი მოჰყვა - 3:0.

ნეიმარი და კომპანია ამჟამად გასავარდნი ზონიდან 2 ქულით არიან მოშორებულები, თუმცა ბრძოლა ჯერ არ დასრულებულა.

41 ქულით მე-15 ადგილზე მყოფი „სანტოსი“ მომდევნო ტურში „ჟუვენტუდს“ ესტუმრება და თუ ამ მატჩს მოიგებენ, უმაღლესში ადგილს შეინარჩუნებენ. როგორც მოგეხსენებათ, ბრაზილიის ჩემპიონატიდან ისტორიაში მხოლოდ 2 კლუბი არ გავარდნილა - „სანტოსი“ და „სან პაოლო“.

33 წლის ნეიმარმა მიმდინარე სეზონში „სანტოსის“ მაისურით 28 ოფიციალური მატჩი ჩაატარა, 8 გოლი გაიტანა და 4 საგოლე გადაცემა შეასრულა.