კიტეიშვილის მე-11 გოლი - შტურმმა 5-მატჩიანი მოუგებელი სერია დაასრულა

გადატვირთული გრაფიკის გათვალისწინებით, „შტურმის“ მთავარმა მწვრთნელმა იურგენ ზაუმელმა გადაწყვიტა ავსტრიის ბუნდესლიგის XV ტურში, სტუმრად „ჰარტბერგთან“ შეხვედრაში გუნდის ლიდერისთვის ოთარ კიტეიშვილისთვის დასვენების საშუალება მიეცა. თუმცა, იმის გამო, რომ გრაცელები მეტოქის გატეხვას ვერაფრით ახერხებდნენ და ქულების კიდევ ერთხელ დაკარგვის საფრთხის წინაშე სრული სერიოზულობით დადგნენ, მათმა დამრიგებელმა ოთარი მოედანზე 54-ე წუთზე შეიყვანა და საბოლოოდ სწორედ ამ უკანასკნელის ერთადერთი ბურთით „შტურმმა“ 1:0 გაიმარჯვა და ყველა ტურნირზე 5-მატჩიანი მოუგებელი სერია დაასრულა.

კიტეიშვილმა გამარჯვების ბურთი მე-80 წუთზე გაიტანა, როდესაც მელოუნის მიერ მოპოვებული პენალტი გოლად აქცია. მთლიანობაში საქართველოს ნაკრების 29 წლის ნახევარმცველმა მოედანზე გატარებულ 36 წუთში ათბალიანი სისტემით 7,6 შეფასება მიიღო, კარისკენ ორჯერ დაარტყა, ერთი საგოლე შანსი შექმნა, ორი საკვანძო პასი გააკეთა, ბურთს 34-ჯერ შეეხო და 9-ჯერ დაკარგა.

ოთარი უკვე ზედიზედ სამი მატჩია მოედანს უგოლოდ არ ტოვებს და „ჰარტბერგთან“ თამაშამდე მან თავის გამოჩენა „ლასკთან“ (1:3) და „პანათინაიკოსთან“ (1:2) შეხვედრებში მოახერხა. მთლიანობაში კი, ყველა ტურნირზე გამართულ 19 შეხვედრაში კიტეიშვილის ანგარიშზე 11 გოლი და 3 საგოლე პასია.