ვილიარეალმა დიდ ბრძოლაში მოიგო - მიქაუტაძემ 68-ე წუთიდან ითამაშა

ესპანეთის ლა ლიგის მე-14 ტურში, გიორგი მიქაუტაძის „ვილიარეალი“ სტუმრად „რეალ სოსიედადს“ დაუპირისპირდა და დაძაბულ ბრძოლაში 3:2 დაამარცხა.

მარსელინომ ქართველი შემტევი სათადარიგოთა სკამზე დატოვა და თამაშში 68-ე წუთიდან ჩართო, როდესაც ანგარიში „ვილიარეალის“ სასარგებლოდ 2:1 იყო.

თავდაპირველად, მიქაუტაძის გუნდი 2:0 იგებდა. ანგარიში პერესმა 31-ე წუთზე გახსნა, 57-ე წუთზე კი მოლეირომ სხვაობა ორამდე გაზარდა. მე-60 წუთზე სოლერმა სხვაობა მინიმუმამდე შეამცირა, 87-ე წუთზე კი ბარენეჩეამ წონასწორობის აღდგენა შეძლო. სოსიედადი ქულის გადარჩენასთან ახლოს იყო, თუმცა მატჩის მიწურულს, „ვილიარეალმა“ მაინც შეძლო გამარჯვების გოლის გატანა. მოლეირომ მეტოქის კარში დუბლი შეასრულა, რითაც თავის გუნდს მნიშვნელოვანი 3 ქულა მოუტანა.

რაც შეეხება გიორგი მიქაუტაძეს, ქართველ შემტევს გოლის გატანის შანსი არ ჰქონია, მისი სტატისტიკა კი ასეთი იყო. ბურთთან 6 შეხება, 4-დან 4 ზუსტი პასი, 1 ზუსტი გრძელი პასი, კარისკენ 1 არაზუსტი დარტყმა, 1 პოზიციური დუელი მოიგო. Sofascore-ს მიერ მისი თამაში 6.7 ქულით შეფასდა.

მიმდინარე სეზონში გიორგი მიქაუტაძემ ლა ლიგაში მე-9 თამაში ჩაატარა, 2 გოლი გაიტანა და 2 საგოლე გადაცემა შეასრულა ასევე, 1-1 გოლი აქვს გატანილი ჩემპიონთა ლიგასა და კოპა დელ რეიზეც.

14 ტურის შემდეგ, „ვილიარეალს“ სატურნირო ცხრილში 32 ქულა აქვს და ამ დროისთვის, მე-2 პოზიციაზე იმყოფება, თუმცა მთავარ კონკურენტს, მადრიდის „რეალს“, რომელსაც ასევე 32 ქულა აქვს, მე-14 ტურის შეხვედრა ჩასატარებელი აქვს. „ვილიარეალი“ მომდევნო მატჩს 6 დეკემბერს, საკუთარ მოედანზე „ხეტაფესთან“ გამართავს, მანამდე კი 3 დეკემბერს, კოპა დელ რეიზე სტუმრად „ანტონიანოს“ დაუპირისპირდება.