კრიზისი დაძლიეს | ქეცბაიას გუნდის დაუმარცხებელი სერია
კვიპროსის ჩემპიონატის მე-12 ტურში თემურ ქეცბაიას გაწვრთნილი „ანორთოსისი’’ შინ აპოელ-ს 88-ე წუთამდე ამარცხებდა, თუმცა მატჩის მიწურულს აპოელ-მა თამაში გადაარჩინა. ანგარიში მე-10 წუთზე ცნობილმა იტალიელმა ფეხბურთელმა სტეფანო სენსიმ გახსნა, „ანორთოსისი'' დააწინაურა. 88-ე წუთზე სტუმართა ბრაზილიელმა ფეხბურთელმა მარკინიოსმა შეაგდო და გუნდი მარცხისგან იხსნა.
თემურ ქეცბაია: „ვგრძნობთ იმედგაცრუებას, რადგან გოლი ბოლოს გავუშვით. ფრე სამართლიანი შედეგი იყო. ადრე დავწინაურდით, ვეცადეთ, ვირბინეთ, აპოელ-ს სივრცე არ მივეცით, მეტოქეს ბევრი საგოლე მომენტი არ ჰქონდა, მაგრამ სამწუხაროდ, ბოლოს გოლი გავუშვით. ბოლო ორ შეხვედრაში ოთხი ქულა ავიღეთ, გამარჯვება სტუმრად და ფრე საკუთარ მოედანზე გუნდთან, რომელიც ჩემპიონობისთვის იბრძვის. ახლა თასის მატჩისთვის ვემზადებით. მადლობა ქომაგებს, ვინც სტადიონზე მოვიდა, ისინი ძალიან დაგვეხმარნენ, მაგრამ სამწუხაროდ, გამარჯვება ვერ ვაჩუქეთ.“
ქეცბაიას მთავარ მწვრთნელად დაბრუნებისას „ანორთოსისი'' კრიზისში იყო, ახლა კი გუნდის დაუმარცხებელი სერია 6-მატჩიანია (2 მოგება, 4 ფრე). 14-გუნდიან ჩემპიონატში 12 ქულით მე-11 ადგილზეა. მომდევნო ტურში, 7 დეკემბერს „აპოლონს'' ესტუმრება.
გოლის ავტორი სენსი ცნობილი ფეხბურთელია, „ინტერსა’’ და იტალიის ეროვნულ ნაკრებში უთამაშია. 2018-22 წლებში, რობერტო მანჩინის მწვრთნელობისას, ეროვნულ ნაკრებში 9 მატჩში 3 გოლი გაიტანა. „ანორთოსისის'' თამაშზე სენსი დიდ გავლენას ახდენს, გუნდს კრიზისის დაძლევაში მაგრად დაეხმარა, შვიდ მატჩში 4 გოლი გაიტანა და 3 საგოლე პასი შეასრულა.
