ექსელსიორის ზედიზედ მეორე გამარჯვება | იეგოიანმა 90 წუთი ითამაშა

ნიდერლანდების ერედივიზიეს მე-14 ტურში „ექსელსიორმა’’ შინ „ბრედას’’ 1:0 მოუგო. „ექსელსიორმა'' ზედიზედ მეორე მატჩი მოიგო და ამ მომენტისთვის გასავარდნ ზონას 4 ქულით უსწრებს, 18-გუნდიან ჩემპიონატში 16 ქულით მე-13 ადგილზეა.

გამარჯვებულთა სასტარტო შემადგენლობაში ირაკლი იეგოიანმა შეუცვლელად ითამაშა. მეტწილად დაცვით ფუნქციებს ასრულებდა. 66-ე წუთზე მთავარმა მსაჯმა იეგოიანს ყვითელი ბარათი უჩვენა. თასის ჩათვლით ამ სეზონში „ექსელსიორში’’ მე-13 მატჩი ჩაატარა და ბარათი პირველად მიიღო.

მე-13 ტურში „ექსელსიორმა'' „აიაქსს'' სტუმრად მოუგო და ავტორიტეტულმა ნიდერლანდურმა გამოცემამ, Voetbalprimeur-მა ქართველი ფეხბურთელი ტურის სიმბოლურ გუნდში შეიყვანა.

ნიდერლანდების ჩემპიონატში იეგოიანმა ზედიზედ 12 მატჩში მიიღო მონაწილეობა, ყველა სასტარტოდან დაიწყო და მხოლოდ ორ მატჩში შეცვალეს (სადებიუტო მატჩში 71-ე წუთზე გაიყვანეს და მე-9 ტურში „სიტარდთან, როცა საგოლე პასი შეასრულა, 81-ე წუთზე დატოვა მინდორი). 10 მატჩი სასტარტოში შეუცვლელად ჩაატარა, რაც ნიშნავს რომ კარგ ფიზიკურ ფორმაშია. დაცვასა და შეტევაში დიდ სამუშაოს ასრულებს. 11 მატჩში მის აქტივში 1 გოლი და 2 საგოლე პასია.

DataMB-ის ინფორმაციით, ტოპ 7 ლიგაში 21-წლამდე ფეხბურთელებს შორის ყოველ ას პასზე მოსალოდნელი საგოლე პასების (xA) რაოდენობით ირაკლი იეგოიანი მე-4 ადგილზეა. პირველზე „რენის’’ 18 წლის ფორვარდი მოჰამედ მეიტეა, ყოველ 100 პასზე მოსალოდნელი საგოლე პასების რაოდენობა 2,71-ს შეადგენს. მეორეზე „ჰელას ვერონას’’ 21 წლის ბრაზილიელი შემტევი ჯიოვანია (0.94), მათ „ლევერკუზენის’’ 19 წლის კამერუნელი ფორვარდი კრისტიან კოფანე მოჰყვება (0,57). მეოთხე ადგილზე ირაკლი იეგოიანი (0.56) და „ტონდელას’’ 20 წლის თავდამსხმელი იეფრეი როდრიგესი არიან (0.56). აღნიშნული სტატისტიკა მოიცავს მიმდინარე სეზონში 10 ნოემბრამდე ჩატარებულ მატჩებს.