შეტევაში აქტიური იყო და მაღალი შეფასება მიიღო | გიორბელიძის კარგი მატჩი
თურქეთის რანგით მეორე ლიგაში „ერზურუმსპორმა’’ შინ „ისტანბულსპორი’’ 4:0 გაანადგურა. გამარჯვებულთა შემადგენლობაში ქართველმა მარცხენა მცველმა გურამ გიორბელიძემ 90 წუთი ითამაშა, შეტევაში აქტიურად ერთვებოდა და მაღალი შეფასება მიიღო, Sofascore-მა 8,1 დაუწერა.
29 წლის მარცხენა მცველს თურქულ კლუბში რეგულარული სათამაშო პრაქტიკა აქვს, მიმდინარე სეზონში თურქეთის ჩემპიონატის 15-ვე ტურში სასტარტოში შეუცვლელად ითამაშა, სამი ყვითელი ბარათი მიიღო.
გიორბელიძის გუნდი დაუმარცხებელია, 26 ქულით მე-5 ადგილზეა და ელიტაში აღზევებისთვის იბრძვის.
გიორბელიძე გამოცდილი ფეხბურთელია, ავსტრიის ბუნდესლიგის „ვოლფსბერგერსა'' (2020-21) და გერმანიის ბუნდესლიგა 2-ის დრეზდენის „დინამოში'' (2021-22) უთამაშია. მოგვიანებით პოლონეთის ექსტრაკლასასა და სერბეთის უმაღლეს ლიგაში გამოდიოდა, 2024 წლის სექტემბრიდან „ერზურუმის'' ფეხბურთელია.
ეროვნულ ნაკრებში 12 მატჩი ჩაატარა, მისი ბოლო ოფიციალური მატჩი 2022 წლის ივნისით თარიღდება, ეროვნულ ნაკრებს გასულ ზაფხულში დაუბრუნდა, კაბო ვერდესთან ამხანაგურ შეხვედრაში ცვლილებაზე გამოვიდა.
