„გურიაში დავბრუნდით და არასოდეს მივატოვებთ“ - ჟორდანიას ამბიციური გეგმები

ლანჩხუთის „გურია“ საქართველოს ერთ-ერთი ყველაზე ტრადიციული კლუბია, რომლის არსებობასაც ქართული ფეხბურთისთვის მუდამ უდიდესი მნიშვნელობა ჰქონდა და დიდი სარგებელი მოჰქონდა. წლევანდელი სეზონი ლანჩხუთელებმა რანგით მეოთხე ლიგაში გაატარეს, თუმცა წარმატებით დაასრულეს და ლიგა 3-ის საგზური მოიპოვეს. კლუბის გულშემატკივართათვის კიდევ ერთი სასიამოვნო სიახლე კი მმართველობით რგოლში მერაბ ჟორდანიას დაბრუნებაა. უკვე ცნობილია, რომ „გურიას“ პრეზიდენტი მისი ვაჟი კახი ჟორდანია იქნება, თუმცა თავად მერაბიც კლუბის მართვაში აქტიურად იქნება ჩართული, რაზეც მან გადაცემაში „სპორტი იმედზე“ სტუმრობისას დეტალურად ისაუბრა.

მერაბ ჟორდანია

„გურიას“ წინაშე არსებული ფინანსური დავალიანება სრულად დაიფარება და შეიქმნება ღირსეული ბიუჯეტი საიმისოდ, რომ ორ წელიწადში ლანჩხუბის კლუბი Crystalbet ეროვნულ საფეხბურთო ლიგაში აღზევდეს. მიმდინარეობს აქტიური სამუშაოები ჩვენს ქალაქში სტადიონის გაკეთების თაობაზე, რომლის ტრიბუნებიც 5 ათას მაყურებელზე იქნება გათვლილი, თუმცა ჩემი ვარაუდით და იმ უდიდესი სიყვარულიდან გამომდინარე, რაც ლანჩხუთელებს ფეხბურთის მიმართ აქვთ, ტევადობის გაზრდა აუცილებლად დაგვჭირდება.

გუნდს ჩემი შვილი კახი ჟორდანია უხელმძღვანელებს, რომელმაც პირობა მომცა, რომ ნებისმიერი შედეგის მიუხედავად, „გურიას“ არასოდეს მიატოვებს და ამ კლუბის ფინანსურ უზრუნველყოფაზე უარს არასოდეს იტყვის. გარდა ამისა, მინდა გითხრათ, რომ დირექტორთა საბჭოს წევრები ვიქნებით მე, მამუკა აბუსერიძე, ავთო ქანთარია, ბადრი დანელია, გოჩა ტყებუჩავა, დავით ცომაია, ოთარ კორღალიძე, გია გურული, ბესო ფრიდონაშვილი და მერაბ თევზაძე - ანუ ის ფეხბურთელები, რომელთა დახმარებითაც 1989 წელს კლუბმა უმაღლესი ლიგის საგზური მოიპოვა.

ცნობისათვის, „გურიამ“ საქართველოს ჩემპიონატის მეოთხე ლიგაში გამოსვლა მესამე ადგილზე დაასრულა და მხოლოდ „იბერიასა“ და „ივერიონს“ ჩამორჩა.