„ახლა სხვა დროა, ადრე ლივერპულელებს ვერ ვიტანდით“ - რუნი ჯერარდს გამოეხმაურა

„ჩვენი დროის ინგლისის ნაკრები? წარუმატებელი ეგოისტები ვიყავით - ის გუნდს კი არა უბრალოდ ნიჭიერი ინდივიდუალისტების დაჯგუფებას წარმოადგენდა, რაც შედეგის მომტანი არასოდეს არის“ - ასეთი შეფასება გაუკეთა სტივენ ჯერარდმა თავის დროინდელ „სამ ლომს“ რიო ფერდინანდის პოდკასტში სტუმრობისას, რამაც ნისლიან ალბიონზე დიდი გამოხმაურება გამოიწვია. ეთანხმება თუ არა ყოფილ თანაგუნდელს, ამის თაობაზე შეკითხვით ერთ-ერთი გამოცემის ჟურნალისტმა უეინ რუნის მიმართა და „შრეკისგან“ ასეთი პასუხი მიიღო:

„მესმის სტივენმა რაც იგულისხმა, მაგრამ მას ბოლომდე ვერ დავეთანხმები. სხვებმაც რომ ასე დაიწყონ ლაპარაკი, ეს ჩვენი თაობის უპატივცემულობა იქნება, რადგან ბევრს ვშრომობდით და ვცდილობდით, მაგრამ ამ ყველაფერმა სათანადო შედეგი ვერ გამოიღო. თანაც, ვერ ვიტყვი, რომ ამ კუთხით ახლანდელი ინგლისის ნაკრები ჩვენზე უკეთესია, საამისოდ ტიტულების მოგებაა საჭირო.

უბრალოდ ბევრი რამ უკეთესობისკენ შეიცვალა. მაგალითად, ზუსტად ვიცი, რომ სანამ წინასასეზონო მზადება დაიწყება, მიუხედავად იმისა, რომ ისინი სხვადასხვა კლუბებს, „მანჩესტერ იუნაიტედსა“ და „მანჩესტერ სიტის“ წარმოადგენენ, ერთად ვარჯიშობენ. ჩვენ დროს, „ლივერპულისა“ და „მანჩესტერ იუნაიტედის“ მოთამაშეები ერთმანეთს დასანახად ვერ ვიტანდით. მე კიდევ ბოლომდე ასე არ ვიყავი, მაგრამ გარი ნევილი, დევიდ ბექჰემი და პოლ სქოულზი მერსისაიდული კლუბის წევრებისგან მაქსიმალურად დისტანცირებულნი იყვნენ.

კიდევ ერთ პოზიტივს ვიტყვი - მედიის მხრიდან ყველაფერი უკეთ შუქდება და ფეხბურთელებიც პრესის წარმომადგენლებთან უკეთესად კონტაქტობენ. კინაღამ დამავიწყდა - ჯერარდთან ახლა გაცილებით კარგი ურთიერთობა მაქვს, ხშირად ვხვდებით ერთმანეთს ბარში და ლუდს ვსვამთ“.

შეგახსენებთ, რომ უეინ რუნი და სტივენ ჯერარდი წლების განმავლობაში ინგლისის ნაკრებში ერთად თამაშობდნენ, თუმცა ვერც მსოფლიოსა და ვერც ევროპის ჩემპიონატზე ღირებულ წარმატებას ვერ მიაღწიეს.