წიტაიშვილის საგოლე პასი | მეცი 0 ქულით გამოკვეთილი აუტსაიდერია

საფრანგეთის ლიგა 1-ის მე-3 ტურში „პარიზმა’’ შინ „მეცი’’ 3:2 დაამარცხა. სამწუხაროდ, „მეცი’’ ლიგა 1-ში ერთადერთი კლუბია, რომელმაც საწყის სამ ტურში ქულაც ვერ მოიპოვა.

ისევე როგორც მეორე ტურში „ლიონთან’’, გიორგი აბუაშვილი და გიორგი წიტაიშვილი ამ მატჩშიც სასტარტო შემადგენლობაში იყვნენ. 54-ე წუთზე წიტაიშვილის საგოლე პასით ბუბაქარ ტრაორემ ანგარიში გაათანაბრა - 2-2.

67-ე წუთზე მოიზეს საიმონმა გამარჯვების გოლი გაიტანა. მე-80 წუთზე „მეცი’’ 10 ფეხბურთელით დარჩა და დარჩენილ დროში გამათანაბრებელი გოლი ვერ შეაგდო.

ქართველმა ფეხბურთელებმა კარგი შთაბეჭდილება დატოვეს, გიორგი წიტაიშვილი აქტიურობდა, პირველ ტაიმში გოლის გატანაც შეეძლო, თუმცა ცუდად დაარტყა.

გიორგი აბუაშვილს გაცილებით მეტი შეუძლია, თუმცა ის ფრანგული კლუბის ფეხბურთელი ზაფხულში გახდა და შესაძლებლობების სრულად გამოვლენისთვის დრო სჭირდება. მისი ადაპტაცია ლიგა 1-ში კარგად მიმდინარეობს და მალე მისი პროდუქტიულობა საგოლე მოქმედებებში აისახება. საინტერესოა, რომ „მეცის'' მთავარმა მწვრთნელმა ქართველი ფეხბურთელები როგორც „ლიონთან'', ასევე დღევანდელ მატჩში 62-ე წუთზე შეცვალა.

ამ მატჩის შემდეგ გიორგი წიტაიშვილი და გიორგი აბუაშვილი საქართველოს ეროვნული ნაკრების შეკრებას შეუერთდებიან. აბუაშვილი ეროვნული ნაკრების დებიუტანტია.

შეგახსენებთ, საქართველოს ეროვნული ნაკრები ფიფას 2026 წლის მსოფლიოს ჩემპიონატის საკვალიფიკაციო ეტაპისთვის მზადებას იწყებს. ვილი სანიოლის გუნდი პირველი სექტემბრიდან თბილისში შეიკრიბება. საქართველოს ნაკრები შესარჩევი ეტაპის საწყის ორ ტურში საკუთარ მოედანზე თურქეთისა (4 სექტემბერი) და ბულგარეთის (7 სექტემბერი) ნაკრებებს უმასპინძლებს.