სისხლის ბოლო წვეთამდე ვიბრძოლებთ | ბურჯანაძე იტალიასთან მარცხის შემდეგ
ევრობასკეტზე, მეორე ტურში საქართველოს კალათბურთელთა ნაკრები იტალიასთან 62:78 დამარცხდა. მატჩის შემდეგ საქართველოს ნაკრების კალათბურთელმა ბექა ბურჯანაძემ მედიასთან ისაუბრა.
ბექა ბურჯანაძე: „ცუდად გვრძნობთ თავს, რადგან ასეთი ანგარიშით წავაგეთ… საბოლოოდ, ჩვენ როგორც გუნდმა მდგრადობა შევინარჩუნეთ, ვიბრძოლეთ, კარგი მომენტებიც გვქონდა, მესამე მეოთხედში კი საერთოდ გამარჯვების სწორ გზაზეც ვიყავით, მაგრამ რაღაცები მოხდა, რაზეც არ მინდა საუბარი. იტალიელებს კარგი სერია ჰქონდათ, ბევრი ქულა აიღეს, ისინი ვერ შევაჩერეთ. მადლობა ბიჭებს, რომ ბოლო წამამდე იბრძოლეს. მიუხედავად იმისა, რომ ეს ჩემი საქმე არაა, უნდა ვთქვა, რომ მსაჯობა უკეთესი შეიძლებოდა ყოფილიყო. შემდეგ თამაშში უკეთესად იქნება. ჩვენ ვიცით, რატომ ვართ აქ და სისხლის ბოლო წვეთამდე ვიბრძოლებთ''.
ბექა ბურჯანაძის აზრით, ევრობასკეტზე ყოველდღიური თამაში კალათბურთელებისთვის ძალიან რთულია, როგორც ფიზიკურად, ასევე მენტალურად: „მოთამაშეების პერსპექტივიდან ასეთ დონეზე ყოველდღიური თამაში მიუღებელია. დღეს იტალიასთან ვითამაშეთ და ბოლო წამამდე ვიბრძოლეთ. ხვალ საბერძნეთთან ვთამაშობთ და წარმოდგენა გაქვთ, როგორი ბრძოლა გველის. ზეწოლა მოთამაშეებზე არა მხოლოდ ფიზიკურად, არამედ მენტალურადაც წარმოუდგენელია. ეს მიუღებელია. შეგვიძლია ვისაუბროთ სატელევიზიო უფლებებზე და ბიზნეს-ინტერესებზე, მაგრამ როცა საქმე კალათბურთს ეხება, ამას ვერ ვიგებ''.
ესპანეთის ძლევისა და იტალიასთან მარცხის შემდეგ საქართველოს ნაკრების მეტოქე საბერძნეთი იქნება. მატჩი ხვალ, 31 აგვისტოს 16:00 საათზე დაიწყება.
