სრული ფიასკო - საქართველო იტალიასთან დამარცხდა

საქართველოს კალათბურთელთა ნაკრებმა ევრობასკეტის მეორე ტურის შეხვედრა იტალიასთან გამართა და 62:78 დამარცხდა.

მეორე ტურში რადიკალურად განსხვავებული საქართველოს ნაკრები ვიხილეთ. ესპანეთთან გამარჯვების შემდეგ, იმ გუნდისგან პარკეტზე მხოლოდ აჩრდილი იყო დარჩენილი.

ბრძოლა მხოლოდ პირველ ტაიმში იყო, რომელიც 32:32 დასრულდა და თითქოს ყველაფერი ნორმალურად იყო, თუმცა დიდი შესვენების შემდეგ, მესამე მეოთხედი იტალიამ 21:15 მოიგო. დასკვნითი მეოთხედი კი 10:0 გაქცევით დაიწყეს, რის შემდეგაც მეტოქე უბრალოდ მიუღწეველი გახდა.

ალექსანდრ ჯიკიჩის გუნდის 12-კაციანი განაცხადიდან დღეს 10-მა მათგანმა ითამაშა, ქულები კი მხოლოდ ექვსმა (!) აიღო. ანდრონიკაშვილმა 4 ქულა ჩააგდო, ბურჯანაძემ კი 7. სანაძემ 8, ბოლდუინმა კი 9.

10-ქულიანი ნიშნული მხოლოდ ორმა გადალახა. მამუკელაშვილმა 13 ქულა, 5 მოხსნა და 3 გადაცემა მიითვალა, თუმცა დასკვნით მეოთხედში მეხუთე პერსონალური მიიღო და თამაში ნაადრევად დატოვა. საუკეთესო გოგა ბითაძე იყო, რომელმაც 22 ქულა და 4 მოხსნა გაიფორმა.

გიორგი შერმადინის მსგავსად, კაპიტანმა თორნიკე შენგელიამ შეხვედრა 0 ქულით დაასრულა - 3 მოხსნა და 5 პასი. ბოლოს არბიტრებს სიტყვიერი შეურაცხყოფაც მიაყენა და ამის გამო, დიდი ალბათობით ხვალ საბერძნეთთანაც ვერ ითამაშებს.

იტალიელთა შორის გამორჩეულები ფონტეკიო (14), დიუფი (13) და ნიანგი (13) იყვნენ. ათქულიანი ნიშნული სამივემ გადალახა. კარგი მატჩი ჰქონდა ნიკოლო მელისაც, რომელმაც 8 ქულა და 8 მოხსნა გაიფორმა.

ჯამში უნდა აღინიშნოს, რომ იტალიამ გაცილებით დალაგებული და გუნდური კალათბურთი ითამაშა. საქართველომ კი ნაცნობი არასტაბილურობა დაიბრუნა, ამ ყველაფერს მოკლე სათადარიგოთა სკამიც დაემატა, რომელიც ასეთ მომენტებში ყოველთვის აქილევსის ქუსლია - შედეგად ლოგიკური და მტკივნეული მარცხი მივიღეთ.

31 აგვისტოს მესამე ტურში ალექსანდრ ჯიკიჩის გუნდი საბერძნეთს დაუპირისპირდება. შეხვედრა კვლავ 16:00-ზე დაიწყება.