კარგი პოზიციიდან ცუდად დაარტყა | დავითაშვილის სენტ-ეტიენმა ქულები დაკარგა

საფრანგეთის ლიგა 2-ის მე-4 ტურში „სენტ-ეტიენი’’ შინ „გრენობლს'' მიკაელ ნადეს გოლით ამარცხებდა, თუმცა მეორე ტაიმში, 77-ე წუთზე იადალი დიაბიმ ანგარიში გაათანაბრა და მატჩი 1:1 დასრულდა. 4 ტურის შემდეგ „სენტ-ეტიენი'', „პაუ'' და „ნანსი'' 8 ქულით სატურნირო ცხრილს ლიდერობენ, თუმცა ბურთების უკეთესი შეფარდების გამო პირველზე „სენტ-ეტიენია''.

„მწვანეების’’ მთავარმა მწვრთნელმა ეირიკ ჰორნელანდმა ზურიკო დავითაშვილი სასტარტო 11-ეულში ათამაშა. ქართველ შემტევს მცირე ტრავმა აწუხებდა, თუმცა თამაშამდე მომჯობინდა და პირველივე წუთიდან მოედანზე იყო. ტრადიციულად, აქტიური და შეტევების გამწვავებაზე მომართული იყო. მე-20 წუთზე მეტოქის საჯარიმოში მყოფს გოლის გატანის კარგი შესაძლებლობა მიეცა, თუმცა ცუდად დაარტყა, ბურთი კარს ააცილა.

ჰორნელანდმა დავითაშვილი არ შეცვალა, მატჩის ბოლომდე ათამაშა. 

ცნობისთვის, ბოლო პერიოდში დავითაშვილს „ბეშიქთაშს“ აქტიურად უკავშირებდნენ. იწერებოდა რომ თურქული კლუბი ფეხბურთელს პირადი კონტრაქტის დეტალებზე შეუთანხმდა და მოლაპარაკებებს „სენტ-ეტიენთან“ აწარმოებდა, თუმცა სატრანსფერო ფანჯარა იხურება და ტრანსფერის ალბათობა მცირეა. სავარაუდოდ, 24 წლის ქართველი შემტევი ლიგა 2-ში დარჩება, რაც ძალიან სამწუხაროა, მით უმეტეს გასული სეზონიდან გამომდინარე, 2024-25 წლების სეზონში ზურიკომ ლიგა 1-ში თავი ძალიან კარგად წარმოაჩინა. 31 მატჩში 9 გოლი გაიტანა და 7 საგოლე პასი შეასრულა (16 საგოლე მოქმედება). მან გოლები საუკეთესო ხუთეულის გუნდებიდან სამს გაუტანა: პსჟ-ს, „მონაკოსა“ და „ლილის“. ასევე, „ოსერთან“ ჰეთ-თრიკი შეასრულა, „ანჟესთან“ - დუბლი.

რაც შეეხება მიმდინარე სეზონს, ზურიკომ ლიგა 2-ში ოთხ მატჩში (3 სასტარტოში) 2 გოლი გაიტანა.

მომდევნო ტურში „სენტ-ეტიენი’’ „კლერმონს’’ ესტუმრება (13 სექტემბერი, 22:00).