ფრე და დრამა პენალტების სერიაში - პსჟ-მ უეფას სუპერ თასი მოიგო

უეფას სუპერ თასის ფინალურ შეხვედრაში პსჟ „ტოტენჰემს“ დაუპირისპირდა და ძირითადი დრო ფრედ 2:2 დასრულდა, პენალტების სერიაში კი პარიზელებმა 4:3 გაიმარჯვეს.

ლონდონელებმა პირველი ტაიმი დამაჯერებლად ჩაატარეს და ტაქტიკურად მეტოქეს თავიანთი თამაში მოახვიეს თავს. 39-ე წუთზე ვან დერ ვენმა სტანდარტულის შემდეგ საჯარიმოში დასწრებაზე ყველას აჯობა და ანგარიში გახსნა.

პარიზელებს კი კარში ზუსტი დარტყმა არ ჰქონიათ. მეორე ნახევარში სიტუაცია არ შეცვლილა. ლუის ენრიკეს ნაცადი 4-3-3 სქემით ამჯერად არ უთამაშია და მათ თამაშში ხარვეზები აშკარა იყო.

მეორე ტაიმის სტარტი პსჟ-სთვის კოშმარული გამოდგა. 48-ე წუთზე კუტი რომერომ თავური დარტყმით ანგარიში 2:0 გახადა.

ლუის ენრიკემ ამის შემდეგ ცვლილებებს მიმართა. სამწუხაროდ კვარაცხელია, რომელიც მთელი შეხვედრა მარჯვენა ფლანგზე თამაშობდა მე-60 წუთზე შეცვალა. საბოლოოდ მოედნიდან დუე და ბარკოლაც გავიდნენ. თამაშში ფაბიან რუისი, ლი კანგ-ინი და გონსალო რამუში ჩაერთნენ და ამ შეცვლებმა გაამართლა.

85-ე წუთზე ლი კანგ-ინმა და 94-ე წუთზე გონსალუ რამუშმა ენრიკეს იმედები გაუმართლეს და პსჟ-მ ანგარიში გაათანაბრა.

ახალი წესების თანახმად, დამატებითი დრო გაუქმებულია და გუნდებმა პირდაპირ პენალტები დაარტყეს, სადაც უფრო ზუსტი პსჟ იყო - 4-3. ისტორიაში პირველად პარიზ სენ ჟერმენი უეფას სუპერ თასის გამარჯვებული გახდა.

კახა კალაძის შემდეგ (2008), ხვიჩა კვარაცხელია მეორე ქართველი ფეხბურთელი გახდა, რომელმაც უეფას სუპერ თასის მოგება შეძლო.