კვარას კურიოზული გოლი - პსჟ-მა სიეტლს მოუგო და ჯგუფიდან პირველი ადგილით გავიდა

საკლუბო მსოფლიო ჩემპიონატის ჯგუფური ეტაპის დასკვნით ტურში, პარი სენ-ჟერმენი სიეტლ სანდერსს დაუპირისპირდა და დამაჯერებლად, 2:0 გაიმარჯვა.

ხვიჩა კვარაცხელია პარიზელთა სასტარტო შემადგენლობაში იყო და 64 წუთი ითამაშა. ამ დროის განმავლობაში აქტიურობდა და მეტოქის კართან რამდენიმე მომენტიც შექმნა. პსჟ-ის პირველი გოლი მის ანგარიშზეა. 35-ე წუთზე ვიტინია კარისკენ ურტყამდა, თუმცა ბურთი ზურგზე ხვიჩა კვარაცხელიას მოხვდა და კარის მიმართულებით აისხლიტა. საბოლოოდ გოლი კურიოზული გამოდგა, რომელიც ხვიჩას ჩაეწერა. ქართველი ფეხბურთელი ლუის ენრიკემ 64-ე წუთზე, ბრედლი ბარკოლათი შეცვალა, როდესაც ანგარიში 1:0 იყო.

დარჩენილ დროში პსჟ-მ კიდევ ერთი გოლი გაიტანა და საბოლოოდ, შეხვედრა 2:0 დასრულდა.

ხვიჩა კვარაცხელიას სტატისტიკა ასეთი იყო - ბურთთან 54 შეხება, 42-დან 37 ზუსტი პასი, 1 საკვანძო პასი, 2-დან 1 ზუსტი ჩაწოდება, 6 პოზიციური დუელიდან 2 მოგებული დუელი. კარის მიმართულებით 2 დარტყმა და ორივე ზუსტი, 1 ართმევა. Sofascore-ზე მისი თამაში 7.8 ქულით შეფასდა.

კვარას ყველა მომენტი:

B ჯგუფის პარალელურად მიმდინარე შეხვედრაში ატლეტიკომ ბოტაფოგოს 1:0 მოუგო. 3 ტურის შემდეგ 6-6 ქულა პსჟ-ს, ბოტაფოგოს და ატლეტიკოს დაუგროვდათ, თუმცა ბურთების უკეთესი შეფარდების გამო ჯგუფიდან პირველი ადგილით პსჟ და მეორე ადგილით ბოტაფოგო გავიდნენ.