ნაპოლის ფრე ინტერთან - ხვიჩამ 91 წუთი ითამაშა

იტალიის სერია A-ს 29-ე ტურის ცენტრალურ მატჩში ხვიჩა კვარაცხელიას „ნაპოლი“ სტუმრად „ინტერს“ დაუპირისპირდა და დაძაბულ ბრძოლაში ფრედ, 1:1 ითამაშა.

ხვიჩა კვარაცხელია ნეაპოლელთა სასტარტო შემადგენლობაში იყო და მოედანე 91 წუთი გაატარა. ამ დროის განმავლობაში ქართველი შემტევი საკუთარი გუნდის შემადგენლობაში ერთ-ერთი გამორჩეული იყო, თუმცა, შედეგიანი მოქმედება არ ჰქონია. ფრანჩესკო კალცონამ კვარა 91-ე წუთზე შეცვალა.

ხვიჩას ყველა მომენტი ინტერთან:

ანგარიში „ინტერმა“ 43-ე წუთზე, მატეო დარმიანის გოლით გახსნა და ტაიმი სიმონე ინძაგის გუნდმა მინიმალური სხვაობით მოიგო. მეორე ნახევარში „ნერაძურის“ კარში გოლი 81-ე წუთზე, ჟუან ჟეზუსმა გაიტანა და საკუთარი გუნდი მარცხისგან იხსნა.

რაც შეეხება ხვიჩა კვარაცხელიას სტატისტიკას, ცნობილმა ანალიტიკურმა პორტალმა Sofascore-მა ქართველ შემტევს 7.0-ქულიანი შეფასება დაუწერა. ხვიჩაზე მაღალი მაჩვენებლები ამირ რაჰმანიმ - 7.1, მატეო პოლიტანომ - 7.5, ალექს მერეტმა - 7.6 და ჟუან ჟეზუსმა - 8.0 დააფიქსირეს. ხვიჩას 6-ჯერ ჰქონდა დრიბლინგის მცდელობა და აქედან ორჯერ წარმატებული აღმოჩნდა, ბურთს 51-ჯერ შეეხო, 30 პასიდან 26 ზუსტად შეასრულა, აქედან 1 გამამწვავებელი პასი იყო. 14 პოზიციური დუელიდან 8 მოიგო, ბურთი 12-ჯერ დაკარგა, 4-ჯერ დაჯარიმდა და მეტოქეს ბურთი 2-ჯერ წაართვა.

29 ტურის შემდეგ „ნაპოლი“ სერია A-ს სატურნირო ცხრილში 45 ქულით მე-7 ადგილზე იმყოფება, „ინტერი“ კი 76 ქულით კვლავ ცხრილის ერთპიროვნული ლიდერია.

ფრანჩესკო კალცონას გუნდი მომდევნო შეხვედრას სანაკრებო პაუზის დასრულების შემდეგ გამართავს. 30 მარტს „ნაპოლი„ საკუთარ მოედანზე „ატალანტას“ დაუპირისპირდება.