ესპანეთის პროკურატურა კარლო ანჩელოტის პატიმრობას ითხოვს
ესპანეთის პროკურატურა მადრიდის „რეალის“ მთავარ მწვრთნელს, კარლო ანჩელოტის საგადასახადო თაღლითობაში ადანაშაულებს.
ესპანური El Diario-ს ინფორმაციით, იტალიელ სპეციალისტს პროკურატურა ორ საგადასახადო დანაშაულს ედავება, რომლებიც საიმიჯო უფლებების არასწორ დეკლარაციასთან არის დაკავშირებული. სააგენტოს ინფორმაციით, საუბარია 2014/15 წლების პერიოდზე.
ესპანური მედია წერს, რომ პროკურატურამ ანჩელოტისთვის 4 წლითა და 9 თვით თავისუფლების აღკვეთა მოითხოვა. უწყება ამტკიცებს, რომ კარლო ანჩელოტიმ საგადასახადო ორგანოებს 1 მილიონ ევროზე მეტი შემოსავალი დაუმალა.
უწყება ადგილობრივ სასამართლოში სარჩელს უახლოეს პერიოდში წარადგენს, რის შემდეგაც სასამართლო პროცესები დაიწყება.