მალიკ მონკის სასწაული და გამარჯვების მომტანი ორიანი | საკრამენტომ გოლდენ სტეიტს მოუგო
„საკრამენტო კინგსმა“ In Season Tournament-ის C ჯგუფი მოიგო და გადამწყვეტ შეხვედრაში „გოლდენ სტეიტ უორიორსს“ სძლია. სტეფ კარისა და კომპანიას ჯგუფში პირველი ადგილის დასაკავებლად 12+ ქულით გამარჯვება ესაჭიროებოდათ და მიზანთან ძალიან ახლოს იყვნენ, მაგრამ კარგი შანსი ვერ გამოიყენეს.
„გოლდენ სტეიტმა“ პირველი ნახევარი შესანიშნავად ჩაატარა და დიდ შესვენებაზე 17-ქულიანი ჰანდიკაპით გავიდა - 72:55. „საკრამენტომ“ ბოლომდე იბრძოლა და მეოთხე მეოთხედის დასრულებამდე 5 წუთით ადრე, წინაც გავიდა, თუმცა უპირატესობა ვერ შეინარჩუნა.
MALIK MONK MAKES IT A 1 POINT GAME ????
— NBA (@NBA) November 29, 2023
If GSW wins by 12+ points, they win West Group C.
If SAC wins OR loses by less than 12, they win West Group C.
???? NBA In-Season Tournament on TNT pic.twitter.com/9unpmGFlI4
საფინალო სირენამდე 50 წამით ადრე, „გოლდენ სტეიტი“ 4 ქულით იგებდა და მისი შეტევა იყო, მაგრამ კარიმ ბურთი დაკარგა და მალიკ მონკმა სამქულიანით სხვაობა მინიმუმამდე დაიყვანა. „უორიორსის“ მორიგი დაკარგვის შემდეგ, „საკრამენტოს“ წინ გასვლის საშუალება მიეცა და მონკმა ურთულესი ორიანით თამაში მოიგო - 124:123.
MALIK MONK CALLED GAME.
— NBA (@NBA) November 29, 2023
KINGS WIN THE GAME AND WEST GROUP C ???? pic.twitter.com/GdQ0XW9iit
მონკი შეხვედრის გმირი გახდა და მის ანგარიშზე 21 ქულა, 3 მოხსნა და 2 ასისტია. დი’აარონ ფოქსმა 29 ქულა, 10 მოხსნა, 7 შედეგიანი გადაცემა და 2 ჩაჭრა დააგროვა, კევინ უერტერს კი 21 ქულა ჰქონდა. „გოლდენ სტეიტს“ 29-29 ქულით სტეფ კარიმ და ენდრიუ უიგინსმა ულიდერეს, კლეი ტომპსონს კი 20 ქულა ჰქონდა.
ამრიგად, ცნობილია ყველა გუნდის ვინაობა, რომლებსაც In Season Tournament-ის მოგების შანსი აქვთ. აღმოსავლეთ კონფერენციაში „მილუოკი ბაქსი“ „ნიუ იორკ ნიქსს“ დაუპირისპირდება, „ინდიანა პეისერსი“ – „ბოსტონ სელტიქსს“. დასავლეთ კონფერენციაში „ლოს ანჯელეს ლეიკერსი“ „ფინიქს სანსს“ შეხვდება, „საკრამენტო კინგსი“ – „ნიუ ორლეან პელიკანსს“.
