ლამაზი გოლები - ბათუმის დინამომ ტორპედოს ქუთაისში მოუგო
კრისტალბეთ ეროვნული ლიგის 27-ე ტურში ცენტრალური მატჩი ქუთაისში შედგა, სადაც „ტორპედომ“ ბათუმის „დინამოს“ უმასპინძლა და 0:3 დამარცხდა.
ანდრეი დემჩენკოს გუნდი უპირატესობას საწყისი წუთებიდანვე დაეუფლა. პირველ ნახევარში პაატა ღუდუშაურმა ბათუმელები დააწინაურა კიდეც, თუმცა ვიდეო რეფერიმ თამაშგარე მდგომარეობა დააფიქსირა.
მეორე ნახევარში ანდრეი დემჩენკოს გუნდმა 4-წუთიან მონაკვეთში ორი ბურთის გატანა შეძლო. 55-ე წუთზე გიორგი ზარიამ საკუთარი ნახევრიდან დიდებული გარღვევა განახორციელა და სეზონის ერთ-ერთი საუკეთესო გოლი გაიტანა.
59-ე წუთზე კი ზარია-ღუდუშაური-ჯოვინოს სამსვლიანი კომბინაცია ამ უკანასკნელის ზუსტი დარტყმით დასრულდა.
შეხვედრაში წერტილი 81-ე წუთზე მატჩის საუკეთესო მოთამაშემ პაატა ღუდუშაურმა დასვა, რომელმაც ჩაბრაძის პასის შემდეგ მეკარეს ერთი-ერთზე აჯობა.
დემჩენკოს გუნდი ამ გამარჯვების შემდეგ, კრისტალბეთ ეროვნულ ლიგას 59 ქულით ერთპიროვნულად ლიდერობს.