„უსამართლობაა“ | ვალენსია ესპანეთის ფეხბურთის ფედერაციის გადაწყვეტილებას გაასაჩივრებს

ლა ლიგის 35-ე ტურში, „ვალენსია“ „მესტალიაზე“ „რეალს“ დაუპირისპირდა და 1:0 იმარჯვა. „ღამურების“ წარმატება „ჩეს“ რამდენიმე ქომაგის ამაზრზენმა ქმედებამ გადაფარა, რომლებმაც ვინისიუს ჟუნიორს რასისტული შინაარსის შეურაცხყოფა მიაყენეს. ესპანეთის ფეხბურთის სამეფო ფედერაციას აღნიშნული ინციდენტი უყურადღებოდ არ დაუტოვებია და „ვალენსია“ დასაჯა.

სადისციპლინო კომიტეტის გადაწყვეტილებით, „მესტალიის“ მარიო კემპესის სახელობის ტრიბუნა, საიდანაც ვინისიუსის მისამართით შეურაცხყოფები გაჟღერდა, მომდევნო 5 მატჩის განმავლობაში გულშემატკივრებისთვის დაკეტილი იქნება. ამასთან, „ჩეს“ 45 000 ევროს ოდენობის ჯარიმის გადახდაც მოუწევს.

„ვალენსიას“ აპელაციის შესატანად 10 სამუშაო დღე აქვს და „ღამურები“ აპირებენ, გადაწყვეტილება გააპროტესტონ. გიორგი მამარდაშვილის გუნდმა ოფიციალური განცხადება გაავრცელა და აღნიშნა, რომ ზემოთ ხსენებული ვერდიქტი უსამართლოა.

„ვალენსიამ დაგმო, გმობს და მომავალშიც დაგმობს რასიზმის ან ძალადობის ნებისმიერი სახის გამოვლინებას. ასეთი ქმედებების ადგილი ფეხბურთში ან ჩვენს საზოგადოებაში არაა და მუშაობას გავაგრძელებთ, რათა ისინი ბოლომდე ამოვძირკვოთ. ვალენსია პოლიციასთან პირველივე წუთიდან თანამშრომლობდა, რათა მესტალიაზე განვითარებული მოვლენების დეტალური ანალიზი მომხდარიყო. გარდა ამისა, კლუბმა სამუდამო დისკვალიფიკაცია მიუსაჯა ქომაგებს, რომელთა იდენტიფიცირებაც სამართალდამცველებმა მოახდინეს. გამომდინარე აქედან, მიგვაჩნია, რომ ჩვენი და იმ გულშემატკივრების დაჯარიმება, რომლებსაც რასიზმთან საერთო არაფერი ჰქონიათ, არაკანონზომიერი, უსამართლო და უპრეცედენტო გადაწყვეტილებაა, რომლის წინააღმდეგაც აუცილებლად გავიბრძოლებთ“, - ნათქვამია განცხადებაში.

საინტერესოა, რომ ესპანეთის ფეხბურთის ფედერაციის გადაწყვეტილება ვალენსიურმა გამოცემებმაც გააკრიტიკეს. Super Deporte-ს თქმით, „მესტალია“ რასისტული სტადიონი არაა და მარიო კემპესის სახელობის ტრიბუნის დროებით დაკეტვა მიუღებელია.