ანჩელოტი: ოსასუნასთან და სიტისთან უკეთ უნდა ვითამაშოთ, მნიშვნელოვანი მატჩები მოდის

კარლო ანჩელოტიმ „სოსიედადთან“ წაგების შემდეგ (0:2) მის გუნდზე და მომავალ მნიშვნელოვან მატჩებზე ისაუბრა, რომლებშიც „რეალს“ მსგავსი შეცდომების დაშვების უფლება აღარ აქვს.

„პირველ ტაიმში ვიბრძოდით, მაგრამ შემდეგ გოლი გავუშვით, შემდეგ კაცნაკლულნი დავრჩით, რის შემდეგაც ყველაფერი გართულდა.

დიახ, მე გაძევება გავაპროტესტე. კარვახალთან არ მილაპარაკია, ასე რომ არ ვიცი ზუსტად რა მოხდა.

ახლა მოდის ძალიან მნიშვნელოვანი პერიოდი, როცა მზად უნდა ვიყოთ და ვალდებულნი ვიყოთ თავიდან ავიცილოთ ის შეცდომები, რაც ბოლო დროს გვქონდა. მომდევნო ორ მატჩში (ოსასუნასთან თასის ფინალი და მანჩესტერ სიტისთან) უფრო ძლიერად უნდა ვითამაშოთ.

როცა ასე აგებ, ეს უსიამოვნოა. მაგრამ ჩვენ წინ უნდა ვიყუროთ, რადგან კოპა დელ რეის ფინალი ახლოსაა და მისი მოგება გვინდა. და შემდეგ არის ჩემპიონთა ლიგა.

დღეს ბევრად უფრო ვერტიკალურად თამაში შეგვეძლო. კურტუას თამაშში ძალიან ხშირად ვრთავდით. ამას მომავალ მატჩებში გამოვასწორებთ.

გულშემატკივრებს ვეტყვი, რომ მნიშვნელოვანი მოთამაშეები დაბრუნდებიან, ჩვენ ვიბრძოლებთ თასებისთვის - და იმედია მათ მოვიგებთ“,

- განაცხადა ანჩელოტიმ.