„შენით ვამაყობ“ - მამუკელაშვილის თამაშს ყოფილი თანაგუნდელი გამოეხმაურა

სანდრო მამუკელაშვილის „სან ანტონიო სპურსმა“ NBA-ის რეგულარული სეზონი „დალას მავერიქსთან“ გამართული მატჩით დაასრულა. გრეგ პოპოვიჩის ბიჭებმა 138:117 იმარჯვეს და ქართველ კალათბურთელს ბრწყინვალე შეხვედრა ჰქონდა - 23 ქულა, 11 მოხსნა, 4 შედეგიანი გადაცემა, 1 დაფარება.

„დალასთან“ მატჩის დასრულების შემდეგ, „მამუს“ ასპარეზობას „მილუოკი ბაქსის“ კალათბურთელი, ბობი პორტისი გამოეხმაურა, რომელიც სანდროს ახლო მეგობარია. პორტისმა „ტვიტერის“ საკუთარ გვერდზე პოსტი გამოაქვეყნა და განაცხადა: „შენით ვამაყობ ძმაო! გარღვევის მომხდენი სეზონი გაისად! მაქსიმალურად კონცენტრირებული დარჩი! მიყვარხარ“.

Proud of you bra!! Break out season next year!! STAY LOCKED IN!! Love https://t.co/Kz1y0X7DTB

— Bobby BP Portis (@BPortistime) April 9, 2023

რეგულარული სეზონის დასრულების შემდეგ, სოციალურ ქსელებში პოსტი მამუკელაშვილმაც გამოაქვეყნა და მხარდამჭერებს მადლობა გადაუხადა: „მეორე წელი დასრულებულია. მადლობელი ვარ ყველასი, ვინც მთელი წლის განმავლობაში მხარს მიჭერდა. ძალიან მიყვარხართ“.

Yr2 ✅ Grateful for everyone who supported me throughout the year! Much love! GSG ???? pic.twitter.com/5mtktJTLvV

— Sandro Mamukelashvili (@Mamukelashvili5) April 9, 2023

ცნობისთვის, მამუკელაშვილმა „სან ანტონიოს“ მაისურით 18 შეხვედრა ჩაატარა და პარკეტზე საშუალოდ 22:50 წუთს ატარებდა. მისი მონაგარი 10.2 ქულა, 6.6 მოხსნა, 2.3 შედეგიანი გადაცემა, 0.6 ჩაჭრა და 0.3 დაფარებაა.