„შეგინახოთ ბილეთები?“ - FIBA-მ ხვიჩას მიმართა
საქართველოს კალათბურთელთა ეროვნულმა ნაკრებმა ისტორიაში პირველად მსოფლიოს ჩემპიონატზე ასპარეზობის უფლება მოიპოვა. ამ ფაქტთან დაკავშირებით FIBA-მ Instagram-ში პოსტი გამოაქვეყნა. კომენტარებში FIBA-ს გვერდმა კვარაცხელია მონიშნა და ქართველ ფეხბურთელს მიმართა: „შეგინახოთ ბილეთები?“
შეგახსენებეთ, მსოფლიო ჩემპიონატის საკვალიფიკაციო ეტაპზე, საქართველოს კალათბურთელთა ნაკრებმა შესარჩევი ეტაპის გადამწყვეტი დასკვნითი მატჩი თბილისში ისლანდიის წინააღმდეგ გამართა და 77:80 დამარცხდა, თუმცა სხვაობა მისაღები იყო და მსოფლიო ჩემპიონატის საგზური ჩვენ დაგვრჩა.
ისლანდიაში მატჩი 88:85 მოვიგეთ, ამიტომ ისლანდიელებს ამ შეხვედრაში 4-ქულიანი ფორით გამარჯვება სჭირდებოდათ (თუ, 88 ქულამდე ასვლას ვერ შეძლებდნენ).
საქართველოს ნაკრების რიგებში საუკეთესო შერმადინი იყო, რომელმაც 23 ქულა ჩააგდო. შენგელიას 21 ქულა ჰქონდა, მაკფადენს კი 17.