ბაიერნთან არ ითამაშებს - მბაპეს 3 კვირა გაუცდება
„პარი სენ-ჟერმენის“ სუპერვარსკვლავმა, კილიან მბაპემ ტრავმა მიიღო და გუნდს 3 კვირით გამოაკლდა. ფრანგულმა გრანდმა ოფიციალური განცხადება გაავრცელა და დაადასტურა ის, რაც ბოლო საათების განმავლობაში, უცხოურ პრესაში იწერებოდა.
Medical update.@Aspetar
— Paris Saint-Germain (@PSG_English) February 2, 2023
„გამოკვლევების შემდეგ დადგინდა, რომ მბაპემ ბარძაყის კუნთი დაიზიანა. მოსალოდნელია, რომ ის 3 კვირას გამოტოვებს“, - ნათქვამია „პარკ დე პრენსის“ ბინადრების განცხადებაში.
შეგახსენებთ, რომ „პარი სენ-ჟერმენს“ ჩემპიონთა ლიგის მერვედფინალში ურთულესი დაპირისპირება ელის და „ბაიერნს“ გაეჯიბრება. პარიზელები პირველ შეხვედრას 15 თებერვალს გამართავენ და ფონს გასვლა კილიანის გარეშე მოუწევთ. განმეორებითი მატჩი 9 მარტსაა ჩანიშნული.
როგორც მოგეხსენებათ, მბაპემ დაზიანება „მონპელიესთან“ გამართულ შეხვედრაში მიიღო. ფრანგმა სუპერვარსკვლავმა პენალტი გააცუდა, 21-ე წუთზე კი, მოედნის დატოვება მოუწია. „პარი სენ-ჟერმენის“ განცხადებაში ნათქვამია, რომ სერხიო რამოსს, რომელსაც ასევე ჯანმრთელობის პრობლემები აქვს, დამატებითი ტესტები ჩაუტარდება.
