საუთგეიტი რჩება - ინგლისის ნაკრებს ევრო 2024-ზეც გაწვრთნის
ინგლისის ფეხბურთის ასოციაცია გარეთ საუთგეიტთან თანამშრომლობას აგრძელებს, 52 წლის სპეციალისტი ინგლისის ეროვნულ ნაკრებს ევრო 2024-ზეც უხელმძღვანელებს, კატარის მუნდიალზე წარუმატებელი გამოსვლის მიუხედავად საუთგეიტი პოსტზე რჩება, რაც ინგლისის ფეხბურთის ასოციაციამ ოფიციალურად დაადასტურა.
საუთგეიტი 2013-16 წლებში ინგლისის ახალგაზრდულ ნაკრებს წვრთნიდა, 2016 წლიდან - ეროვნული გუნდის მთავარი მწვრთნელია. 2018 წლის მუნდიალზე ინგლისის ეროვნულმა ნაკრებმა მე-4 ადგილი ადგილი დაიკავა, ევრო 2020-ის ფინალში კი იტალიასთან პენალტების სერიაში დამარცხდა.
რაც შეეხება 2022-ის მუნდიალს, 1/4-ფინალში ინგლისი საფრანგეთთან 1:2 დამარცხდა და ტურნირს დაემშვიდობა. არსებობდა ვარაუდი, რომ გარეთი პოსტს დატოვებდა, თუმცა საბოლოოდ დარჩენა გადაწყვიტა და თანამშრომლობის გაგრძელებით ორივე მხარე მოხარულია.
საუთგეიტს ინგლისის ფეხბურთის ასოციაციასთან მოქმედი კონტრაქტი 2024 წლის დეკემბრამდე აკავშირებს.
