18 წლის ქართველი მეკარე კარიერას ლისაბონის სპორტინგში გააგრძელებს

CrystalSport-ის ცნობით, საქართველოს 18-წლამდე ნაკრების კაპიტანი პაპუნა ბერუაშვილი კარიერას ლისაბონის ''სპორტინგში'' გააგრძელებს.

ნიჭიერი მეკარე თბილისის ''დინამოს'' აკადემიის აღზრდილია. პორტუგალიურ კლუბში გადასვლით 18 წლის მეკარეს წარმატებული კარიერის შექმნის დიდი შესაძლებლობა ექნება.

ლისაბონის ''სპორტინგი'' ისტორიული კლუბია, 1906 წლის პირველ ივლისს დაარსდა, პორტუგალიის ჩემპიონატი 19-ჯერ მოიგო, უკანასკნელად 2020-21 წლების სეზონში. გარდა ამისა, პორტუგალიის თასზე 17-ჯერ გაიმარჯვა, 4-ჯერ კი ლიგის თასის მფლობელი გახდა. 1963-64 წლების UEFA-ს თასების მფლობელთა თასის სეზონი ტრიუმფით დაასრულა.

სავარაუდოდ, საწყის ეტაპზე პაპუნა ბერუაშვილი ''სპორტინგის'' 23-წლამდე გუნდში ან სარეზერვო გუნდში ითამაშებს. შესაძლოა, პირველ გუნდშიც ვიხილოთ. ეს დამოკიდებულია თავად მოთამაშეზე, რა დროში მოახერხებს საუკეთესო თვისებების გამოვლენას.

ამჟამად, პაპუნა ბერუაშვილი საქართველოს 18-წლამდე ნაკრებთან ერთად პორტუგალიაშია, სადაც საერთაშორისო ტურნირში მიიღებს მონაწილეობას. ლაშა ფირცხალაიშვილის გუნდი ტურნირის ფარგლებში მასპინძელი პორტუგალიის (25 მარტი), ჩრდ. მაკედონიისა (29 მარტი) და სლოვაკეთის (27 მარტი) 18-წლამდე ნაკრებებს დაუპირისპირდება.

შეგახსენებთ, გამორჩეულ პორტუგალიურ კლუბებში კიდევ ორი ქართველი მოთამაშე გამოდის: ''ბრაგას'' 23-წლამდე გუნდში 18 წლის მარცხენა მცველი გიორგი ჩხეტიანი ასპარეზობს, ხოლო ''პორტუს'' 17-წლამდე გუნდის მოთამაშე გიორგი აბუაშვილია. ასე რომ, ბერუაშვილის სახით პორტუგალიურ ფეხბურთში დამკვიდრებას კიდევ ერთი ნიჭიერი ქართველი ფეხბურთელი ეცდება. მათ გარდა ''ჟილ ვისენტეს'' შემადგენლობაში საქართველოს ეროვნული ნაკრების მოთამაშე გიორგი აბურჯანია ირიცხება.