,,ხაჭაპური, ხაჭაპური" - თანაგუნდელებმა შერმადინს ინტერვიუს მიცემა არ აცადეს

ACB ლიგის მორიგ ტურში ტენერიფემ გრან კანარიას უმასპინძლა და 9-ქულიანი სხვაობით, ანგარიშით - 98:89 დაამარცხა. მატჩში გამორჩეული გიორგი შერმადინი იყო, რომელმაც ორივე გუნდში საუკეთესო შედეგი დააფიქსირა.

ქართველი კალათბურთელი სასტარტო ხუთეულში არ ყოფილა, თუმცა პარკეტზე 22 წუთი და 44 წამი გაატარა. 

შერმადინის სრული სტატისტიკა: 25 წუთი, 25 ქულა (7/7 ორქულიანი, 13-დან 11 საჯარიმო), 10 მოხსნა, 1 პასი, 1 დაფარება. მატჩი ორი ჯარიმით დაასრულა, მასზე კი წესები 10-ჯერ დაარღვიეს. რაც ყველაზე მნიშვნელოვანია – ქართველი ცენტრის მარგი ქმედების კოეფიციენტმა 41-ს მიაღწია.

აღსანიშნავია, რომ შერმადინის უშუალო კონკურენტი იგორ პუსტოვოი გახლდათ. გრან კანარიას ცენტრი უკრაინის ნაკრების ხუთეულის წევრია და 26 ნოემბერს, საქართველოს ნაკრებთან სათამაშოდ, თბილისში ჩამოვა. პისტოვოიმ ამ მატჩში 22 წუთი ითამაშა და 8 ქულა და 7 მოხსნა მოაგროვა.

შეხვედრის დასრულების შემდეგ, როდესაც შერმადინი მედიასთან მატჩს აფასებდა, თანაგუნდელებმა საუბარი - ,,ხაჭაპური, ხაჭაპურის" შეძახილებით არ აცადეს.

შეგახსენებთ, რომ 11 ტურის შემდეგ ტენერიფეს 16 ქულა აქვს და მესამე ადგილზე იმყოფება. ვიდორეტას გუნდი მხოლოდ რეალსა და ბარსელონას ჩამორჩება.

ტენერიფე შემდეგ ტურში სტუმრად, მანრეზას დაუპირისპირდება.